Smáfroða um páskalægðina

Á laugardagskvöld (23. apríl) á að hvessa af suðaustri um landið vestanvert rétt einu sinni. Allkröpp lægð fer síðan framhjá á páskadag. Lesendum sem vilja fá nánari spá er bent á vef Veðurstofunnar. Lítum á gervihnattamynd sem tekin var um miðnætti á föstudagskvöld. Þetta er hitamynd. Því hvítari sem svæðin eru því kaldari eru þau.

Lægðin sem olli illviðrinu í gær (sumardaginn fyrsta) og hlýindum norðaustanlands í dag er á hringsóli á Grænlandshafi. Nýja lægðin er suðvestur í hafi og stefnir til Íslands eins og svarta örin sýnir. Hún rétt missir af stefnumóti við vetrarkalt loft (lítinn kuldapoll) sem nú er yfir Hudsonsundi og æðir austur um (bláa örin). Gaman verður að fylgjast með skeiði hans þar til að kvöldi páskadags að hann kemur að Suðausturlandi með miðjuþykktinni 5140 metrar - gangi tölvuspár eftir.

Þykktarvandir lesendur hungurdiska vita að þessi þykkt táknar að snjór eða él falla úr lofti og hálku er von á vegum. En tölvuspár vanmeta oft þá hlýnun sem verður þegar kalt loft streymir út yfir hlýjan sjó - e.t.v. einnig í þetta sinn.

En lægðin djúpa á annað stefnumót, við leifar gömlu lægðarinnar (græn ör). Kannski að afl útsynningshvellsins á páskadag eigi eftir að ráðast af því stefnumóti.

En þessi texti er bara froða - alvöruspárnar eru annars staðar.

Athugasemdir

[óli Hilmar Briem Jónsson (IP-tala skráð) 23.4.2011 kl. 18:19]

.........stórskemmtilegur pistill að venju og hvergi froðu að merkja að mínu mati ,

heldur skýr texti um væntanlegt páskahrakviðri. Ef lægðin væri páskaegg ,sem

er vaninn að gefa  á þessum hátíðisdegi , - væri málshátturinn  líklega svona: 

" Eftir lægð , kemur önnur ".  Ég ók yfir Hellisheiði seint á fimmtudagskveldi og

hef varla séð það verra , - ofsaveður á Sandskeiði  , og svo þykk þokan eftir að

í Svínahraunið kom, að skyggnið var varla tvær bíllengdir og sunnan stormur ofan í kaupið ,sem er nokkuð sérstakt með svo svartri  þoku.  " Gjörningaveður" .

Þó var nú eins og SV eftirrétturinn væri sparlega skammtaður, en líklega fáum

við tvöfalda ábót af þeim desert eftir páskalægðina.  Ef " þykktin " verður eins

og Hungurdiskar reikna með við SA land innan skamms , - hvað gerist þá?

Flest þetta út eða kemur staðbundið hret eða heldur karúselið áfram eins og

gíróseðlar inn um bréfalúguna? En burtséð frá því , - þá held ég að það væri full

ástæða að gefa út í bók eða hefti valdra kafla úr Hungurdiskum því þetta eru

góðir , fróðlegir og skemmtilegir pistlar - og ágæt kennslufræði í veður - og

veðureðlisfræði. 

                                 Óli Hilmar Briem

[Trausti Jónsson, 24.4.2011 kl. 01:33]

Þakka þér fyrir Óli Hilmar. Ég minnist einkum á kuldapollinn litla sem skemmtiefni fyrir veðurnördin heldur en sérstakt áhyggjuefni. En ég er alltaf að reyna að koma því að veðurfyrirbrigði eru fleiri og fjölbreyttari heldur en almennt er um talað. Veðrið er ekki bara lægð og hæð.