Lægsti hiti á veðurstöðvum í febrúar

Listi yfir hæsta hita á einstökum veðurstöðvum í febrúar hékk á hungurdiskapistli í fyrradag. Hér með fylgir listi yfir lægsta hita á stöðvunum í febrúar. Gallinn er sá að hann er aðeins fullgerður aftur til 1924. Til eru lægri, eldri gildi á nokkrum stöðvum t.d. bæði í Reykjavík og á Akureyri. Vonandi verður búið að bæta úr þessum ágalla áður en febrúar 2012 rennur upp. Það er vonandi einhver huggun í því að lægsta talan -30,7 stig, frá Möðrudal 4. febrúar 1980 er alla vega lægri en allar aðrar febrúartölur allt frá 1874.

Lægstu tölurnar eru:

upph.ár endaár metár metdagur met stöð

1961 2010 1980 4 -30,7 Möðrudalur

1993 2010 2008 2 -30,3 Veiðivatnahraun

1939 1960 1955 10 -29,5 Möðrudalur

1994 2010 1995 8 -29,1 Kolka

1994 2010 2008 2 -29,1 Þúfuver

2004 2010 2009 12 -29,0 Svartárkot sjálfvirk stöð

1997 2010 1998 12 -27,5 Mývatn

1997 2010 2009 7 -27,5 Mývatn

1938 1960 1955 10 -27,4 Reykjahlíð

1998 2010 2002 24 -27,3 Setur

1966 2004 1969 6 -27,2 Hveravellir

Sjálfvirka stöðin við Mývatn er í Neslandatanga. Tvær af tölunum eru nærri því nýjar, frá því í miklu kuldakasti í febrúar 2009.

Lægsta febrúartalan í Reykjavík er eldri en taflan, -18,3 stig frá 15. 1886, lægsta febrúarlágmark á Akureyri er frá 27. 1882. -24,0 stig. Jón Þorsteinsson landlæknir mældi 20 stiga frost í Reykjavík 18. febrúar 1839, en hans mælir var of lágt frá jörðu til þess að vera samanburðarhæfur, auk þess var mælirinn óvarinn. Sama má segja um mælingu Rasmusar Lievog frá Lambhúsum á Álftanesi -18,8 stig þann 6. febrúar móðuharðindaveturinn 1783 til 1784. Svo mældi vonScheel -32,0 á Akureyri 6. febrúar 1808. Líka fulllágt frá jörð með óvörðum mæli.

Eins og venjulega er listinn fjórskiptur: Fyrst koma sjálfvirku veðurstöðvarnar. Síðan eru sjálfvirkar stöðvar vegagerðarinnar og mannaðar stöðvar á tímabilinu 1961 til 2010. Að lokum eru mannaðar stöðvar á tímabilinu 1924 til 1960. Hugsanlega er eitthvað af villum í listunum.  Fyrsti ársdálkurinn sýnir upphaf tímabilsins sem miðað er við á hverri stöð, annar dálkurinn síðasta ár safnsins (oftast 2010) og síðan koma metár og metdagur (sem hér er auðvitað í febrúar). Athugið að stöku stöð hefur aðeins verið starfrækt mjög stuttan tíma eða er þá nýlega byrjuð. Nýju stöðvarnar eiga oft eftir að slá sín „met“ á næstu árum og eru jafnvel að því þessa dagana.

Marga athyglisverða atburði má sjá þegar rýnt er í listana, t.d. hvað landslag hefur mikil áhrif á lágmarkshitann og hve mikill munur er á inn- og útsveitum.  

Skrár tengdar þessari bloggfærslu:

• lægstu lágmörk veðurstöðva í febrúar

Athugasemdir

[(IP-tala skráð) 16.2.2011 kl. 16:18]

Góðan dag.

Datt í hug að setja fyrirspurn mína hérnai nn þar sem ég hef tvívegis ritað veðurstofu bréf og sett fram þessa spurningu en ekkert svar borist.....

Hvað hefur skráður meðalhiti á Egilsstöðum lækkað mikið eftir að mælirinn var fluttur frá svokölluðum Truntubökkum ( Ártröð) rétt við Eyvindarár yfir á flugvallarsvæðið þar sem mér skilst að núverandi staðsetning sé?

Fyrra bréf mitt barst Magnúsi Jónssyni sem "svaraði" í löngu máli án þess að svara spurningunni, hið seinna var sent löngu seinna eða fyrir einu eða tveimur árum og mér tjáð að þú yrðir sennilega settur í það að svara því þegar ég hringdi og vitjaði svars. Enn hefur ekkert svar borist, er einhver ástsæða fyrir því?

Með kveðju og von um að ekki taki mörg ár í viðbót að fá svar.

Sigurlaug Gísladóttir

Brekkuseli 1

Egilsstöðum