Dægurútgildi í febrúar

Hér koma dægurútgildi í febrúarmánuði. Listinn er í viðhenginu. Þar má finna hámarkshita hvers dags, lágmarkshita hvers dags í byggð og á landinu öllu og loks er mesta sólarhringsúrkoman.

Eina myndin sem við skoðum sýnir dægurhámarkið. Þar er greinilegt að hærri hiti en 15 stig er sárasjaldgæfur í febrúar. Þó hefur það þrisvar gerst að hámarkið hefur farið í 17 stig eða meira. Metið á Dalatangi 17. febrúar 1998, 18,1 stig. Sauðanesviti komst í 17,2 stig þann  21. 2006 og Dalatangi náði 17,0 stigum þann 8., 1960. Elsta metið er frá Fagradal í Vopnafirði þann 6. 1935, en sá mánuður var reyndar óvenjukaldur.

Eins og algengast er að vetri eru það Sauðanesviti (5), Dalatangi (5) og Seyðisfjörður (8) sem eiga flest dægurhámörkin í febrúar. Fleiri stöðvar þar sem svipað hagar til eru einnig á listanum.

Ég vil sérstaklega benda á lélega útkomu hlaupársdagsins, hún stafar fyrst og fremst af því að hann á ekki nema fjórðungsmöguleika á hárri tölu á við aðra daga. Það mun fyrr eða síðar koma að því að hann fái ámóta hita og aðrir dagar þ.e. að minnsta kosti 13. til 15 stig.

Lægsti hiti sem mælst hefur í febrúar á landinu er -30,7 stig þann 4. árið 1980 en þá hreinsaði Möðrudalur upp þrjú dægurmet í röð. Möðrudalur á reyndar hvorki meira né minna en 15 dægurmet í febrúar miðað við allar stöðvar en 19 sé aðeins miðað við stöðvar í byggð. Kaldur staður á vetrum Möðrudalur. Hugsanlegt er að fáeinar líklegar hálendisstöðvar muni í framtíðinni sækja á í kuldaköstum framtíðarinnar, þar er Brúarjökull líklegastur, af stöðvum í byggð eru Svartárkot, Mývatn og Grímsstaðir á Fjöllum auðvitað líka skæðar.

Ein sunnlensk stöð er á byggðarlistanum. Það eru Þingvellir sem eiga lægsta hita í byggð þann 6. 1969. Elsta metið á lágmarkalistunum er frá 1882 en þá mældust -25,1 stig á Grímsstöðum á Fjöllum þann 27.

Mesta sólarhringsúrkoma í febrúar er 233,9 mm og mældist hún á Vagnsstöðum í Suðursveit að morgni 28. febrúar 1968 í eftirminnilegu flóðaveðri um mestallt sunnanvert landið. Þessi tala stóð sem íslandsmet í rúm 10 ár. Elsta metið á úrkomulistanum er 110,2 mm sem mældust á Teigarhorni þann 7. 1938.

Mér þætti vænt um að fá að vita ef einhver verður var við villur í listanum.

Skrár tengdar þessari bloggfærslu:

• dagaútgildi í febrúar

Athugasemdir

[Sigurður Þór Guðjónsson, 6.2.2011 kl. 12:14]

Í Veðráttunni í febrúar 1932 er 15 stiga hitinn í Fagradal þ. 22. líka tiltekinnn þ. 23. en þú telur þetta kannski vera tvöfalt hámark og tilgreinir það þá ekki. Hvernig er annars með þessi  undarlegu 15.5 stig sem Veðráttan er með fyrir Vík í Mýrdal þ. 15. 1955 og er hæsta talan sem hægt er að finna fyrir daginn á mannaðri veðurstöð að því er ég held. Er það rétt mæling?  Og þessar gömlu frosttölur. Eru þær teknar eftir stökum dagsetningum í dönsku árbókunum eða er búið að fara yfir alla daga í upprunalegu skýrslunum? Það væri nú gaman.

[Trausti Jónsson, 6.2.2011 kl. 23:59]

Já, ég hefði átt að telja 23. 1932 með. Hitametið í Vík í Mýrdal 1955 held ég að sé alveg eðlilegt. Gríðarlega hlýtt háþrýstisvæði var fyrir suðvestan land og norðvestanstrengur yfir landinu, mér sýnist í fljótu bragði að þykktin hafi verið vel yfir 5400 m. Gömlu frosttölurnar eru ekki bara úr árbókunum heldur einnig vinnuheftum dönsku veðurstofunnar. Þar eru ívið fleiri tölur en eru í árbókunum. En ég hef ekki farið yfir allar stöðvarnar dag fyrir dag. Ég held að slík yfirferð skili ekki miklu í febrúar en gæti gert það í janúar og mars enda sleppi ég þeim mánuðum úr þessum listum í bili. Þeir klárast vonandi síðar.