Með snarpara móti - miðað við árstíma

Leifar vetrarins lifa oft lengi fram eftir í norðurhöfum og slettast þar um svæðið í líki snarpra kuldapolla. Í þeim miðjum er afskaplega kalt, en komist þeir í námunda við hlýrra loft úr suðri geta þar myndast öflugar lægðir sem valda leiðindum þar sem þær fara hjá. Við þekkjum þetta auðvitað mætavel hér á landi, oftar þó í formi norðlægra hreta heldur en útsynningskasta þegar komið er fram yfir miðjan maí. 

Við finnum þó slík útsynningsköst í fortíðinni, sum voru minnisstæð vegna vandræða sem þau ollu í sauðburðinum, en gera minna af sér nú á dögum þegar allt slíkt á sér stað í húsum. Ekki þarf að fara mörg ár aftur til að rekast á leiðindaútsynning í síðari hluta maímánaðar. Það var 2018. 

Nú er spáð einhverju ámóta (veðrið er þó aldrei eins). Ekkert verður á þessu stigi sagt til um það hvort veruleg leiðindi fylgja - eða bara bleytuhrollur. Þetta er samt með snarpara móti (rætist spár).

w-blogg170523a

Hér má sjá spá evrópureiknimiðstöðvarinnar um hæð 500 hPa-flatarins, vind og hita í honum síðdegis á föstudag, 19.maí. Gríðarlegur vindstrengur er þá yfir landinu. Vindhraði í 5 km hæð meiri en 50 m/s. Jafnhæðarlínur þéttar eftir því. Við vitum um fáein tilvik með svona miklum vindi yfir Keflavíkurflugvelli síðari hluta maí, en að jafnaði líða samt mörg ár á milli þess sem það gerist. 

Mikil hlýindi fylgja, en aðeins stutta stund. Þykktin (en hún mælir hita í neðri hluta veðrahvolfs) á að fara upp fyrir 5560 metra yfir Austurlandi um þær mundir sem kortið gildir. Það er því rétt hugsanlegt að við fáum fyrstu 20 stig ársins á landinu þennan dag - en vegna sólarleysis er það samt algjörlega sýnd veiði en ekki gefin. Leiðindaveður verður um mikinn hluta landsins - og það jafnvel í nokkra daga.

Lægðarmiðjan er vestur á Grænlandshafi. Spár segja að miðjuþrýstingur hennar fari niður fyrir 970 hPa á föstudag. Það er ekki algeng tala á þessum tíma árs hér við land - en þar sem lægðin er langt vestan við land eru lágþrýstimet ekki í hættu hér á landi. Hæð 500 hPa-flatarins í háloftalægðarmiðjunni er líka óvenjulág, 5010 metrar. Við vitum ekki um mörg lægri tilvik yfir landinu - en einhver má finna í nágrenni þess - sé leitað. 

Við, veðurnördin, getum alla vega skemmt okkur eitthvað yfir þessu. Aðrir verða bara að gera sem best úr á sinn hátt og við vonum öll að sumarið verði gjöfult. 


Bloggfærslur 17. maí 2023

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Feb. 2024
S M Þ M F F L
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29    

Nýjustu myndir

  • w-1949-iskort
  • Slide19
  • Slide18
  • Slide17
  • Slide16

Heimsóknir

Flettingar

  • Í dag (28.2.): 1
  • Sl. sólarhring: 87
  • Sl. viku: 1183
  • Frá upphafi: 2336692

Annað

  • Innlit í dag: 1
  • Innlit sl. viku: 1060
  • Gestir í dag: 1
  • IP-tölur í dag: 1

Uppfært á 3 mín. fresti.
Skýringar

Eldri færslur

Innskráning

Ath. Vinsamlegast kveikið á Javascript til að hefja innskráningu.

Hafðu samband