en Akureyrarsumarið í því ...

Í síðasta pistli var ekki alveg lokið við sumarmetinginn, sumarið nyrðra varð að mestu leyti útundan (svo ekki sé talað um eystra). Við göngum nú frá tölunum fyrir Akureyri.

Sumarið byrjaði sérlega vel norðanlands og austan, júnímánuður með 15 stig af 20 mögulegum á Akureyri enda var bæði óvenjusólríkt og hlýtt - toppskor (5 stig) í báðum tilvikum. Úrkoma og úrkomudagafjöldi náði samtals 5 stigum - af tíu mögulegum. Júlí gaf hins vegar aðeins 6 stig og ágúst 9. Undanfarin sumur hafa verið miklu blandaðri á Akureyri heldur en í Reykjavík og bæði góðir og vondir mánuðir gengið hjá. Reykjavíkursumur síðustu ára hafa hins vegar nær eingöngu verið góð - og þá langflestir mánaðanna líka.

Gæðasumma mánaðanna þriggja á Akureyri er 30 stig (af 60 mögulegum). Frá 1928 hefur þó ekkert sumar náð meira en 40 stigum. Það var 2012 - í fyrra. Stigin 30 gefa akureyrarsumrinu 2013 22. sæti af 86. Meðaltal áranna 1961 til 1990 er 23 stig og meðaltal síðustu 10 ára 29 stig. Greinilega vel heppnað sumar á Norðurlandi austanverðu.

Í pistlinum í gær kom fram að sumardagafjöldinn til þessa á Akureyri væri 39. September á að meðaltali þrjá sumardaga nyrðra og október einn (1961 til 1990). Enn getur því bætt í fjöldann.

Enn verður að taka fram að einkunnagjöf þessi er leikur þó hann byggi á mælingum. Vísindagildi er ekkert. Þeir sem láta að því liggja eru á villigötum - megi þeir finna rétta veginn sem fyrst.