Fyrstu tíu dagar september 2025

Fyrstu tíu dagar septembermánaðar hafa verið til þess að gera hlýir um mikinn hluta landsins. Meðalhiti í Reykjavík er 10,2 stig og er það +0,6 stigum ofan meðallags sömu daga áranna 1991 til 2020 og +0,4 stigum ofan meðallags síðustu tíu ára. Hitinn raðast í 13. hlýjasta sæti (af 25) á öldinni. Hlýjastir voru sömu dagar árið 2010, meðalhiti þá 13,8 stig. Kaldastir voru þeir 2012, meðalhiti 8,1 stig. Á langa listanum raðast hitinn nú í 31. hlýjasta sæti (af 151). Kaldastir voru þessir sömu dagar árið 1977, meðalhiti þá var aðeins 5,7 stig.

Á Akureyri er meðalhiti nú 9,7 stig, +0,1 stigi ofan meðallags 1991 til 1990, en -0,5 stigum neðan meðallags síðustu tíu ára.

Hitanum hefur verið nokkuð misskipt á landinu. Að tiltölu hefur verið hlýjast um landið suðaustanvert. Þar eru þessir tíu dagar þeir fjórðuhlýjustu á öldinni, en mun svalara hefur verið á Vestfjörðum og Ströndum og Norðurlandi vestra. Þar raðast hitinn í 16. hlýjasta sæti (af 26).

Á einstökum veðurstöðvum er hlýjast að tiltölu á Höfn í Hornafirði. Hiti þar hefur verið +1,5 stigi ofan meðallags síðustu tíu ára. Kaldast, að tiltölu, hefur verið á Hornbjargsvita, -1,8 stig neðan meðallags síðustu tíu ára.

Úrkoma í Reykjavik hefur mælst 43,2 mm og er það um 50 prósent umfram meðallag. Á Akureyri hefur úrkoman mælst 83,3 mm, meir en fjórföld meðalúrkoma og hefur aldrei mælst jafnmikil þessa sömu daga. Sama má segja um Dalatanga. Þar hefur úrkoman mælst 268,2 mm og hefur ekki mælst jafnmikil áður sömu daga.

Sólskinsstundir hafa mælst 51,9 í Reykjavík, um 11 umfram meðallag. Á Akureyri hafa sólskinsstundirnar mælst 24,5, 10 færri en í meðalári.

Loftþrýstingur hefur verið óvenjulágur, svipað og var fyrstu tíu daga ágústmánaðar.