Í flatneskju - (og augun hvarfla til norðurs)

Nú er hitabylgjan mikla alveg frá. Í stað hennar hefur lægri þrýstingur tekið við, en engar afgerandi lægðir alveg við landið, þær öflugustu ganga nú til norðausturs nærri Bretlandseyjum. Á austurvæng hverrar lægðar er hlýtt loft og sullast eitthvað af slíku í átt til okkar þegar hver lægð fer hjá, en á móti kemur að lægðirnar draga einnig á eftir sér slóða af kaldara lofti úr norðri. Óljóst hvor aldan, sú suðræna eða sú norræna skilar meiru hverju sinni. Erfitt að halda utan um það þegar lægðirnar eru að minnsta kosti þrjár. 

Þótt kuldinn á norðurslóðum sé á venjubundnu vorundanhaldi tregðast hann við yfir Norður-Íshafi, þar er varnarþing hans að sumarlagi. Eftir því sem meginlöndin hlýna þrengir meira að honum, það sem eftir er af kuldanum safnast saman í afmarkaðar háloftalægðir, kuldapolla. 

Spákort evrópureiknimiðstöðvarinnar gildir síðdegis á miðvikudag, 28.maí 2025. Jafnhæðarlínur eru heildregnar, af þeim ráðum við vindstyrk og stefnu í miðju veðrahvolfi. Mikil flatneskja er við Ísland, en öflug röst úr vestri stefnir á Bretland (ein af lægðunum áðurnefndu). Litirnir sýna þykktina, en hún mælir hita í neðri hluta veðrahvolfs. Í hitabylgjunni vorum við inni í gulum og brúnum lit - en þeir eru nú fjarri. Þykktin hefur minnkað um rúma 200 metra (hiti fallið um 10 stig). Ámóta hæð og var hér fyrir viku er nú nærri Úralfjöllum, en þó hlýrri, eins og vera ber yfir meginlandi. Eins eru mikil hlýindi austarlega í Síberíu og vestarlega í Kanada.

Á norðurslóðum eru hins vegar þrír afgerandi kuldapollar. Sá eini sem við þurfum að fylgjast vel með er sá við Norðausturgrænland, þykktin í miðju hans er ekki nema 5090 metrar, hávetur á smábletti. Flatarhæð og þykktarmynstur eru nokkurn veginn sammiðja þannig að ekki er auðvelt að ráða í hvaða stefnu pollurinn tekur - taki hann á annað borð á rás. Við höfum ekki mikinn áhuga á að fá hann hingað - en það er samt alveg jafnlíklegt og hvað annað. Spá reiknimiðstöðvarinnar á hádegi gerir reyndar ráð fyrir því að svo verði - og að þar með verði fullhefnt fyrir blíðuna. 

Við getum samt ekki látið einhverjar líkanhótanir valda okkur teljandi áhyggjum - við bíðum alla vega áreiðanlegri frétta - það er mjög margt sem getur riðlað spánum, margt sem líkönin ekki sjá. Bandaríska veðurstofan er með allt aðrar hugmyndir - og mun viðkunnanlegri - alla vega sem stendur.