Smávegis af febrúar

Febrúar var hlýr hér á landi, nokkuð vantaði þó upp á methlýindi. Mikil umskipti frá fyrra mánuði. Taflan sýnir hvernig hiti á spásvæðunum raðast. Taflan nær til 25 ára. 

Að tiltölu var hlýjast við Faxaflóa þar sem þetta var næsthlýjasti febrúar á öldinni. Hlýrra var 2013. Á öðrum spásvæðum er algengast að hitinn raðist í 3. til 4. hlýjasta sæti aldarinnar. Að tiltölu var kaldast á Ströndum og Norðurlandi vestra þar sem hiti raðast í 6. hlýjasta sæti aldarinnar, og í 5. sæti á Austurlandi að Glettingi. 

Kort evrópureiknimiðstöðvarinnar sýnir meðalhæð 500 hPa-flatarins (heildregnar línur), meðalþykkt (daufar strikalínur) og þykktarvik (litir). Hér á landi var þykktin 50 til 70 metrum yfir meðallagi, hiti var 2,5 til 3,5 stig ofan meðallags í neðri hluta veðrahvolfs. 

Vestanáttin í háloftunum var nokkuð undir meðallagi, en sunnanáttin vel yfir meðallagi - eins og kortið sýnir. Sunnanáttin hefur þó þrisvar á þessari öld verið ámóta mikil í febrúar, það var 2023, 2018 og 2003.