Fyrri hluti júnímánaðar 2024

Vegna viðvarandi tölvuvanda á Veðurstofunni eru tölur hálfsmánaðaruppgjörsins ekki jafn nákvæmar og venjulega - nægilega nákvæmar þó fyrir hinn venjulega lesanda. Fimm athuganir (af 120) vantar t.d. frá höfuðstöðvunum í Reykjavík. En meðalhiti reiknast 7,8 stig, -1,5 stigi neðan meðallags 1991-2020 og -1,7 neðan meðallags síðustu tíu ára. Hitinn raðast í 21. hlýjasta sæti (af 24) meðal sömu almanaksdaga á öldinni. Hlýjastir voru þeir 2002, meðalhiti þá 12,0 stig, en kaldast var 2001, meðalhiti 7,6 stig. Á langa listanum raðast hiti nú í 114. sæti (af 152). Hlýjast var 2002, en kaldast 1885, þá var meðalhiti fyrri hluta júní aðeins 5,8 stig.

 

Á Akureyri er meðalhitinn nú 6,7 stig, -2,1 stigi neðan meðallags 1991-2020 og -3,0 stigum neðan meðallags síðustu tíu ára. Raðast í 75. hlýjasta sæti síðustu 89 ára, hlýjast var í fyrra, 2023, en kaldast 1952.

 

Að tilölu hefur verið kaldast á Ströndum- og Norðurlandi vestra, þar raðast hitinn nú í 22. sæti það sem af er öldinni, tvisvar hefur fyrri hluti júní verið kaldari þar. Hlýjast að tiltölu hefur verið á Suðausturlandi, þar raðast hitinn í 16. hlýjasta sæti.

 

Nú vantar upplýsingar frá fjölmörgum stöðvum vegna áðurnefndrar tölvubilunar - en á þeim stöðvum sem lítið sem ekkert vantar hefur verið hlýjast að tiltölu í Seley þar sem hiti er -0,2 stigum neðan meðallags síðustu tíu ára. Kaldast að tiltölu hefur verið á Grímsstöðum á Fjöllum, hiti þar -4,1 stig neðan meðallags síðustu tíu ára.

 

Úrkoma hefur verið lítil í Reykjavík, aðeins mælst 5,7 mm, um þriðjungur meðalúrkomu - en fyrri hluti júní hefur þó oft verið enn þurrari. Á Akureyri hefur úrkoman mælst 38,0 mm, meir en fjórföld meðalúrkoma (óstaðfest). Á Dalatanga hefur hún mælst 30,7 mm og er það um 70 prósent meðalúrkomu sömu daga.

 

Sólskinsstundir hafa mælst 125,1 í Reykjavík, 27,3 stundum umfram meðallag. Á Akureyri hafa sólskinsstundirnar mælst 78,1, 20,9 stundum færri en í meðalári.

Athugasemdir

[Einar Vilhjálmsson (IP-tala skráð) 17.6.2024 kl. 12:05]

Eru einhver teikn greinanleg sem vísa til þess að loftslagsbreytingar geti haft í för með sér að hæðir norðvestan við landið kunni að verða langlífari og/eða að umfangsmiklar lægðir norðaustan við landið kunni að verða það einnig á einhverjum árshlutum í framtíðinni. Að tilgátan sé líkleg til samþykktar um að hitastigsmunur eftir landshlutum kunni að aukast í landinu á einhverjum tímabilum hver árs.

[Trausti Jónsson, 20.6.2024 kl. 19:29]

Einar - það eru engin greinanleg teikn um slíkar breytingar. Misjöfn hlýnun meginlanda og heimshafa (og mismunandi hlýnun N-Ameríku, Evrópu og norðurslóða) mun leiða til einhverra breytinga á loftstraumum - en áratugi eða jafnvel öld þarf til að hægt verði að greina þær frá almennu suði í veðrakerfinu. Menn hafa hvað eftir annað talið sig geta greint einhver breytingamerki - en þau hafa hingað til aldrei haldið í lengdina - nema hin almenna hlýnun. - Verði hlýnunin nægilega mikil - eða verði breytingar á hafstraumum vegna hennar kann þó að verða hægt að greina loftstraumabreytingar líka - en slíkt hefur enn ekki orðið.