Fyrstu 20 dagar ágústmánaðar - tuttugu stig í Reykjavík

Meðalhiti fyrstu 20 daga ágústmánaðar er +12,5 stig í Reykjavík. Það er +1,2 stigum ofan meðallags sömu daga árin 1991 til 2020 og +1,5 stigum ofan meðallags síðustu tíu ára. Hitinn raðast í sjöttahlýjasta sæti aldarinnar (af 23). Hlýjastir voru þessir dagar árið 2004, meðalhiti 13,5 stig, en kaldastir voru þeir í fyrra, 2022, meðalhiti þá 10,0 stig. Á langa listanum er hiti nú í 8. hlýjasta sæti (af 151), hlýjast var 2004, en kaldast 1912, meðalhiti þá 7,6 stig.

Á Akureyri er meðalhiti fyrstu 20 daga ágústmánaðar 11,7 stig. Það er +0,5 stigum ofan meðallags 1991 til 2020 og +1,0 stigum ofan meðallags síðustu tíu ára.

Hita er enn misskipt milli landshluta. Hlýjast að tiltölu hefur verið á Suðurlandi. Þar er hitinn í fimmtahlýjasta sæti aldarinnar og því sjöttahlýjasta við Faxaflóa og á Vestfjörðum. Aftur á móti er hann í 17.hlýjasta sæti á Austfjörðum og hiti undir meðallagi.

Miðað við síðustu 10 ár hefur að tiltölu verið hlýjast á Þverfjalli, hiti þar +2,2 stig ofan meðallags og +2,1 stig ofan þess á Skálafelli. Kaldast að tiltölu hefur verið á Fonti á Langanesi. Þar er hiti -0,8 stig neðan meðallags, og -0,7 stig neðan þess á Vattarnesi.

Úrkoma hefur víða verið lítil. Hún hefur þó mælst 26,5 mm í Reykjavik - og er það um 75 prósent meðalúrkomu. Á Akureyri hafa aðeins mælst 0,6 mm (en sömu daga 2012 aðeins 0,1 mm).

Sólskinsstundir hafa mælst 129,3 í Reykjavík, um 15 stundum umfram meðallag. Á Akureyri hafa sólskinsstundirnar mælst 117,8, rúmlega 20 umfram meðallag.

Enn lifir þriðjungur mánaðarins.

Hitinn í Reykjavík marði loks 20 stig í gær (sunnudag 20.ágúst) - í fyrsta sinn á þessu sumri - og í fyrsta sinn í tvö ár. Hámarkið á Veðurstofutúni var 20,6 stig. [Rétt að rifja upp að einu sinni liðu 16 ár án þess að hiti næði 20 stigum í Reykjavík]. Líkur á 20 stiga hita eru almennt litlar í Reykjavík og minnka ört eftir miðjan ágúst. Þó komst hiti í 20 stig 25. ágúst 2015 - þá í fyrsta skipti á sumrinu (og það eina). Aðeins er vitað um eitt ár með 20 stiga hita í Reykjavík síðar á sumrinu. Það var 1939, þá fór hiti í 20 stig bæði 31. ágúst og 3. september. Árið 1837 fór hiti í 20 stig þann 20. ágúst - eins og nú og líka þann 24. og þ.20., 21. og 22. og 23. árið 1829. Þessar eldri mælingar eru þó ekki alveg samanburðarhæfar við nútímann vegna þess að mælarnir voru nær jörðu - og ekki í skýli. Við notum þær því ekki í metingi - en gott að vita af þeim samt.

Á undanförnum árum hefur mælingum fjölgað mjög á höfuðborgarsvæðinu. Í gær (20.ágúst) fór hiti í 20 stig á flestum stöðvunum, hæst 22,3 stig í Urriðaholti. Þær stöðvar sem ekki náðu 20 stigum voru þessar: Hljómskálagarður (19,3 stig), Seltjarnarnes (15,8 stig), Reykjavíkurflugvöllur (19,9 stig), Hólmsheiði (19,6 stig), Arnarnesvegur (19,6 stig). Mæling barst ekki frá kvikasilfursmæli í skýli (kemur e.t.v. síðar).

Síðustu 103 ár hefur hiti mælst 20 stig eða meira 80 sinnum í Reykjavík (tími samfelldra hámarkshitamælinga). Af þessum árum hefur hiti ekki komist í 20 stig 67 ár. Fimmtán ár í röð (1961-1975) voru tuttugustigalaus (16 ár milli tuttugustiga). Sumarið 1939 komst hiti 7 daga í 20 stig, 6 daga 2004 og 7 daga 2008. Á þessari öld hefur hiti 39 sinnum komist í 20 stig í Reykjavík, á 17 árum. Öldin á því nærri því helming tilvika - og nær helming ára, þrátt fyrir að vera aðeins fjórðungur heildarárafjöldans. Freistandi er því að segja að tuttugustigadögum hafi fjölgað - en um framtíðina vitum við ekki.

Á 103 árum hefur hiti einu sinni farið í 20 stig í maí og september, 10 sinnum í júní, 51 sinni í júlí og 16 sinnum í ágúst. Líkur á 20 stiga hita eru því langmestar í júlí.