Óvenjudjúp lægð - miðað við árstíma

Nú (föstudagskvöld 12.apríl) er bæði hvasst og hlýtt á landinu. Hvassviðrið hefur raskað flugi um Keflavíkurflugvöll í dag - enn eitt dæmi um athyglisvert samspil nútímalifnaðarhátta og veðurs - fyrir ekki svo löngu hefði kostnaður og vesen vegna nákvæmlega sams konar hvassviðris ekki verið teljandi. - En vindurinn heldur áfram að blása og síðdegis á morgun, laugardag 13.apríl, fer að gæta áhrifa nýrrar lægðar suðvestur í hafi. Sú er þegar þetta er ritað um það bil að leggja í óðadýpkun, meir en 35 hPa á sólarhring. 

Evrópureiknimiðstöðin segir miðjuþrýstinginn fara niður í 946 hPa síðdegis. Við virðumst eiga að sleppa við versta veðrið - en nógu hvasst verður samt - sé að marka spár. Það er athyglisvert að spár hafa síðustu daga gert meira og meira úr lægðinni sjálfri - en smám saman gert minna úr úrkomunni sem fylgir henni hér á landi. Mikill fjöldi dægurhámarkshitameta féll á veðurstöðvum í dag, m.a. bæði í Reykjavík (11,9 stig) og á Akureyri (15,1 stig). Gamla Akureyrardægurmetið (14,6 stig) er frá 1967 - aðeins 6 dögum síðar, þann 18., fór frostið á Akureyri í -14,8 stig - eftirminnileg umskipti fyrir þá sem það muna. 

Þó eitthvað dragi aftur úr hvassviðrinu á sunnudaginn eru fleiri lægðir - grynnri þó - í sjónmáli fram eftir næstu viku. 

Það er ekki mjög oft sem lægðir fara niður í 946 hPa í apríl - íslandsmetið í lágþrýstingi er 951,0 hPa sett á Bergstöðum í Skagafirði þann 11. árið 1990 og ómarktækt hærri (951,3 hPa) á Dalatanga þann 3. árið 1994. Þrýstingur virðist hafa farið niður fyrir 950 hPa í lægðinni 1994 þó ekki mældist svo lágur á stöðvunum - hefði e.t.v. gert það við sambærilegar aðstæður nú þegar mælt er samfelldara og þéttara. Ekki er vitað um nema þrjú önnur tilvik með lægri þrýstingi en 960 hPa í apríl hér á landi (1947, 1897 og 1904). 

Athugasemdir

[Ben.Ax. (Benedikt Jóhannes Axelsson), 13.4.2019 kl. 19:12]

Á maður ekki bara að halda sig innandyra?

[Helga Kristjánsdóttir, 14.4.2019 kl. 00:57]

Getur þetta verið af mannavöldum-

[Hjalti Þórðarson (IP-tala skráð) 14.4.2019 kl. 14:18]

Hún var víst óvenjudjúp þessi og vorkenni ég fólki sem lenti í að bíða á flugvellinum. Misskipt var veður með eindæmum. Eg var að vinna alla vikuna á mínum heimaslóðum í Skagafirði við þannig vinnu að ekki mátti gola mikið. Til allrar lukku var logn nánast alla vikuna en tók að gola aðeins úr suðri í gær en aldrei varð hvasst. Hiti var líka með miklum ágætum (óopinberi mælirinn minn sýndi mest 17,0 gráður) í gær sem er ágætt fyrir miðjan apríl. 

[Baldur Gunnarsson (IP-tala skráð) 15.4.2019 kl. 10:30]

Af manna völdum? Fyrr á öldum urðu svona veður víst af manna völdum. Gjörningaveður, svo nefnd.