Kuldi í lofti

Máttur sólarinnar er mikill - en - þrátt fyrir að víða um landið sunnan- og vestanvert mælist nú hæsti hiti það sem af er ári og veðurblíða stingi sér víða niður er ekki allt sem sýnist. Frekar kalt er í lofti - nætur kaldar - og jafnvel hætta á næturfrosti á stöku stað í bjartviðri og hægum vindi. 

Næturfrosthætta líður að vísu hjá um leið og eitthvað þykknar í lofti og vind hreyfir - en þá afhjúpast líka kuldinn í sólarleysi og gjósti. - Flestir vilja víst heldur sólina og hægviðrið - þótt það kosti kaldar næstur. 

Kalda loftið sem hefur undanfarna daga læðst frá norðurslóðum ríkir næstu daga á mjög stóru svæði eins og sjá má á kortinu hér að neðan.

Myndin sýnir spá evrópureiknimiðstöðvarinnar um hæð 500 hPa-flatarins og þykktina næstu tíu daga - en mest ber þó á lituðum þykktarvikunum. Þykktin mælir hita í neðri hluta veðrahvolfs og þykktarvikin sýna því hversu mikið hitinn víkur frá meðallagi áranna 1981 til 2010. Talan milli Vestfjarða og Grænlands er -60 metrar, sem þýðir að búist er við því að hiti verði að meðaltali um -3 stigum undir meðallagi á þeim slóðum næstu tíu daga - og það er mikið á þessum tíma árs. 

En við verðum að sjálfsögðu að hafa í huga að hér er um tíu daga meðalkort að ræða - ekki verður sami kuldi allan tímann - þykktin á að ná lágmarki sínu um helgina - þá verða vonandi einhver vindur og ský til að forða miklum næturkulda. 

Það ber líka til tíðinda að langt suður í hafi er í uppsiglingu sérlega djúp lægð - miðað við árstíma - hafi reiknimiðstöðin rétt fyrir sér (sem ekki er víst) - ameríska spáin er ekki nærri því jafnkrassandi. Lægðin kemur ekki mikið við sögu hér á landi - en bætir í norðaustanáttina um helgina. 

Annars er auðvitað best að vera bara grunlaus um kulda af þessu tagi - meðan sólin skín í heiði og lognið umvefur land og sæ verða fáir varir við hann - nema auðvitað veðurnördin - og margir lesendur þessa pistils klóra sér bara í höfðinu yfir masi ritstjóra hungurdiska - og láir þeim það enginn.  

Athugasemdir

[Hilmar Hafsteinsson (IP-tala skráð) 6.7.2016 kl. 13:55]

Bestu þakkir fyrir að kannast við kuldann Trausti. Júlímánuður verður sannarlega svalur - eins gott að fara að búa sig undir sumarhretin.

Meðfylgjandi er krækja á yfirlit Unisys Weather yfir 8 - 16 júlí 2016, Evrópa & Ísland:

http://weather.unisys.com/gfs/gfs.php?inv=0&plot=850&region=eu&t=9p

[Birnuson, 7.7.2016 kl. 15:34]

Það er óhætt að taka undir þessi orð Hilmars. Spá Veðurstofu Íslands er á sömu nótum eins og hér má sjá:

Á laugardag:
Norðaustlæg átt, 10-13 m/s á Vestfjörðum, en annars hægari og rigning víða um land. Hiti 8 til 13 stig.

Á sunnudag og mánudag:
Norðaustan 8-13 m/s og votviðri víða um land. Fremur milt veður.

Á þriðjudag og miðvikudag:
Hæg norðlæg átt og skúrir eða dálítið rigning. Áfram milt veður.
Spá gerð: 07.07.2016 09:42. Gildir til: 14.07.2016 12:00.