Smávegis af júní 2016

Þó þurrt hafi verið víðast hvar á landinu langt fram eftir júnímánuði endar úrkoman samt í meðallagi áranna 1961-1990 - og vel yfir meðallagi síðustu tíu ára um nær allt land. Á einstöku stað norðaustan- og austanlands er þurrkurinn þó ekki búinn. -

Mánuðurinn er auk þess einn af hlýjustu júnímánuðum mælitímans - ekki alveg á toppnum að vísu - en nálægt - nema við suðurströndina. Þetta stendur nokkuð glöggt - uppi í Hreppum virðist hann ætla að lenda í 6. sæti (frá 1880), en á Eyrarbakka í kringum 20. sæti (frá sama tíma) - og á Stórhöfða í Vestmannaeyjum ekki nema í kringum 50. sæti (mjög litlu munar þó á sætum). - Í Reykjavík lendir hann nærri 7. sæti og á Akureyri í því 4. eða 5. Stykkishólmur á enn möguleika á 3. sætinu - en gæti hrapað niður í 5. verði síðasti dagur mánaðarins kaldur.

En yfirlit Veðurstofunnar greinir frá endanlegum tölum - vonandi sem fyrst.

Athugasemdir

[kristinn geir steindórsson briem (IP-tala skráð) 30.6.2016 kl. 17:54]

alltaf skemmtileg þessi tölfræði ef öll meðalúrkoma hefði fallið 1.maí en væri þurrt allan mánuðinn þar á eftir kæmi það gróðri ekki vel það sem bjargaði gróðri í maí var að hann var nokkuð hlýr og það kom raki(dögg) á nóttunni þó litill væri. munaði um það. síðan kom góðviðrið uppúr 20.maí sem var dásamlegt en tölfræðin er skrítin fræði sem seigir lítið í raun.  vorum með mikla tölfræði í fjármálaheiminum hvernig gat hann hrunið með alla þessa tölfræði. en tölfræðin hefur mikið skemmtanagildi fyrir mér annað ekki. eflaust seigir mönum hvað þarf lítið til að skemmta mér

[kristinn geir steindórsson briem (IP-tala skráð) 30.6.2016 kl. 17:59]

kjáninn ég auðvitað átti þettað að vera 1.júní hvernig skildi þettað líta út í töljrðini

[Óskar J. Sigurðsson (IP-tala skráð) 1.7.2016 kl. 11:11]

 Nógu sumarkalt á Stórhöfða að meðaltali þó ekki sé kaldast þar allra veðurstöðva á landinu eins og í júní s.l. Það er heppilegt að búið er að leggja staðinn í eyði. Vestmannaeyjabær var svo 3. kaldasta stöðin eftir meðaltali síðustu 10 ára.Þar hafast þó nokkrir við ennþá.

[Trausti Jónsson, 1.7.2016 kl. 15:27]

Það er gott að skemmta sér yfir tölum Kristinn. - Óskar, mér finnst hafa verið grunsamlega kalt á Stórhöfða upp á síðkastið miðað við Vestmannaeyjabæ (svosem eins og 0,2 til 0,3 stig). Mælirinn var tekinn úr skýlinu í fyrra og settur í hólk. En ég þori ekki annað en að rannsaka málið betur - haldi þetta áfram svona.