Forðast okkur

Hlýja loftið virðist eiga að halda áfram að forðast okkur sem mest það má. Þetta ástand sést vel á meðalþykktarspá evrópureiknimiðstöðvarinnar fyrir næstu tíu daga (fram til þess 21.)

Jafnhæðarlínur 500 hPa-flatarins eru heildregnar og sýna mikla háloftalægð (kuldapoll) rétt við landið. Jafnþykktarlínur eru daufar, strikaðar - en þykktarvik eru sýnd í lit. Þykktin mælir hita í neðri hluta veðrahvolfs. Bláir litir sýna hvar hiti er undir meðallagi áranna 1981 til 2010. Mikið lægðardrag liggur allt frá N-Kanada til suðausturs um Ísland til Spánar - í því öllu er hiti undir meðallagi - mest við Ísland.

Við höfum reyndar vanist enn stærri vikum áður í sumar, en þetta er alveg nóg. Talan við Vesturland (sést sé kortið stækkað) er -46 metrar. Hiti í neðri hluta veðrahvolfs er meir en -2 stigum undir meðallagi. - Varla alveg svo mikið niðri í mannheimum - en nægilega mikið. 

En þetta er meðalkort - nokkrar sveiflur eru oftast frá degi til dags - en kannski minni nú en oft áður. Satt best að segja er engar teljandi breytingar að sjá á veðurlagi - þó gætu komið nokkrir þurrir dagar norðaustanlands - slíkt væri vel þegið ef býðst. 

Um helgina mun sérlega hlýtt loft fara til norðurs um Noreg allan - hvort það nægir í hitamet þar vitum við ekki enn. 

Athugasemdir

[Torfi Stefánsson (IP-tala skráð) 12.8.2015 kl. 09:23]

Kuldalegt er nú yfir huga þér Trausti! Samkvæmt mínu kokkabókum er hins vegar búið að vera hlýtt í júlí og það sem af er ágúst, a.m.k. hér á höfuðborgarsvæðinu.

Meðalhitinn fyrstu 10 daga ágústmánaðar í Reykjavík er 11 stig, sem er 0,2 stigum yfir meðaltalinu. Hitinn er vel yfir meðalhita mánaðarins á báðum þeim 30 ára tímabilum sem miðað er við. Árin 1931-1960 var meðalhitinn 10,9 stig og 1961-1990 var hann 10,2 stig eða mun lægri en nú. Meðalhiti það sem af er þessari öld er hins vegar 11,4 stig eða 0,4 gráðum hærri en það sem af er þessum mánuði. Sem sé þokkalega hlýtt heilt yfir!

Reykjavík er nú í 39. sæti á 67 ára hitalistanum það sem af er mánaðar, sem er alls ekki slæmt. Ársmeðaltalið í Reykjavík er nú í 48. sæti, þ.e. 19 kaldari ár síðustu 67 árin og eru það nú öll ósköpin. Ársmeðalhitinn á Akureyri er í því 42. - en í 31. á Dalatanga - sem sýnir að árið í heild hafi verið hlýtt norðanlands og austan, þó svo að frekar kalt hafi verið í sumar. Það er því varla hægt að tala um þetta ár sem kuldaár þó svo að það ná ekki hlýindunum frá 2003 til og með 2012.