Illviðrið

Illviðrið í dag (miðvikudaginn 25. febrúar) varð heldur hlýrra en margar spár gerðu ráð fyrir. Það blotnaði fyrr og hríðin varð ekki jafnslæm og langvinn á láglendi eins og óttast var. - Nema auðvitað á sunnanverðum Vestfjörðum - og svo fengu fjallvegir og hálendi að sjálfsögðu að kenna á því. 

Lægðin mun hafa orðið dýpst um 945 hPa í lægðarmiðju og í fljótu bragði sýnist sem þrýstingur hafi lægstur 950,8 hPa á veðurstöðvunum - það var á Gufuskálum kl.19.

En ekki allt búið enn. Eins og pistill hungurdiska fjallaði um í gær er aðþrengt kalt loft norður af Vestfjörðum - og því halda engin bönd. Það er þó þannig að eftir því sem aðhaldið þokast austur og suður á bóginn léttir heldur á og smám saman dregur úr vindi.

Við skulum nú til gamans líta á nokkur spákort. Öll nema það síðasta eiga við stöðuna kl. 9 í fyrramálið (fimmtudag 26. febrúar) - og eru því strangt tekið engin spá fyrir flesta lesendur - klukkan verður væntanlega orðin 9 þegar flestir lesa textann.

Fyrsta kortið sýnir sjávarmálsþrýsting, vind og klukkustundarúrkomu kl.9 - eins og harmonie-spálíkanið segir fyrir um. 

Hægur vindur ríkir um meginhluta landsins. Meginlægðin er rétt suður af Mýrdal og hreyfist hér austnorðaustur. Önnur lægð er yfir Breiðafirði á suðurleið. Hún hverfur úr sögunni síðar um daginn. Fyrir suðaustan land er suðvestanstormur, en norðan rok eða ofsaveður á Vestfjörðum og suður á utanvert Snæfellsnes. 

Mikil úrkoma er við Vatnajökul sunnanverðan - sem og norðan til á Vestfjörðum. Vestfjarðaúrkoman er illkynjaðri ef svo má segja - hún situr föst á sama stað allan daginn og hefur gert alla nóttina. 

Næsta kort sýnir uppsafnaða úrkomu frá því kl. 18 í kvöld (miðvikudag) og fram til kl.9 í fyrramálið. 

Talan yfir Drangajökli er 147mm, þeir eiga að hafa fallið á aðeins 15 klukkustundum og 72mm eiga að hafa fallið í fjöllin inn af Dýrafirði. Þetta eru háar tölur - og sýna (með miklum vindi) að snjóflóðahætta hlýtur að vera umtalsverð - enda má sjá á vef Veðurstofunnar (undir flipanum ofanflóð) að svæðið er merkt rautt (mikil hætta - næstefsta hættustig). En - lesið um ástandið á vef Veðurstofunnar - hungurdiskar spá ekki fyrir um snjóflóð eða snjóflóðahættu.

Næsta kort sýnir vindinn á sama tíma, kl. 9 fimmtudaginn 26. febrúar.

Þetta er sama vindspá og á fyrsta kortinu hér að ofan, en hér sjást mörk illviðrisins og styrkur þess enn betur. Segja má að alla grænbláu litina vanti við mörkin. Þau eru eins og veggur sem hreyfist hægt til austurs - hvort líkanið sýnir mörkin á réttum stað vitum við ekki fyrr en í fyrramálið - en rétt að vera á verði. Flestir landsmenn sitja í mjög hægum vindi og spyrja sig þeirrar spurningar sem veðurfræðingum finnst hvað mest þreytandi: Hvar er þetta veður sem verið var að tala um? En svarið er á kortinu - alla vega klukkan 9. 

Síðasta kortið sem gildir kl. 9 sýnir tilraunaskafrenningsspá Vegsýnar, Vegagerðarinnar og Veðurstofunnar. Ritstjórinn hefur fylgst nokkuð með skafrenningsspánni í vetur og sýnist hún lofa góðu.

Miklum skafrenningi er spáð á meginhluta Vestfjarða og yst á Snæfellsnesi. Auk þess á sumum fjallvegum sunnan til á Austfjörðum. En spáin gildir ekki allan daginn - skafrenningurinn á að breiða úr sér eftir því sem á daginn líður. 

Síðasta spákortið sem við lítum á í þessari syrpu gildir kl.21 annað kvöld, fimmtudag 26. febrúar. Það er evrópureiknimiðstöðin sem spáir um ástand í 925 hPa-fletinum.

Hér er lægðin komin suðaustur fyrir land og við sjáum kalda strokuna úr norðri standa suður yfir allt landið vestanvert - en heldur vægari en um morguninn. Enn er hægviðri eystra - og þegar norðanstrengurinn kemst loks þangað hefur vonandi dregið enn frekar úr afli hans. Sjá má að áttin er víðast hvar rétt vestan við norður - sú átt á erfitt uppdráttar um landið vestanvert - og vindur verður sums staðar hægur þar - þrátt fyrir strenginn í lofti. - En eins og venjulega er rétt að hafa varan á á ferðalögum og búast við hverju sem er undir miklum vindstrengjum. 

Athugasemdir

[Torfi Stefánsson (IP-tala skráð) 26.2.2015 kl. 09:39]

Það er alltaf leiðinlegt þegar illvirðisspárnar rætast ekki alveg. En hvað með það. Þá má alltaf spá næsta illvirði - og það sem fyrst - og vona að engin muni spána ef hún rætist ekki.
A.m.k. er það greinilega mjög mikilvægt fyrir veðurfræðingana á Veðurstofuna að minnast aldrei á það í veðurfréttum, hvort spárnar frá í gær rættust eða ekki - né að tala um hvernig veðrið hafi verið síðasta sólarhringinn.
Nei! Þá er mikilvægarara að segja frá því hvernig veðrið verður á morgun á Norðurlöndunum, á meginlandi Evrópu og í Norður-Ameríku. Íslendingar eru jú alltaf á faraldsfæti, eða er það ekki?

[Helga Kristjánsdóttir, 26.2.2015 kl. 15:23]

Mikilvægast er að veðurfræðingar hafa æ ofan í æ,varað fólk við illviðrum,hálku,að vera ekki á ferð með tengivagna,svo dæmi séu tekin. Sjaldan bregst að þau varnaðar orð séu réttmæt.Ég held að það sé við veðurguðinn að sakast ef hann bregður út af vananum. Veðurfræðingar lýsa því margoft að það gæti brugðið til beggja átta,einmitt vegna aðstæðna sem þeir þekkja að eru ekki einhlýtar. 

[Trausti Jónsson, 26.2.2015 kl. 23:26]

Fréttum af veðri líðandi dags var úthýst úr veðurfréttum sjónvarps fyrir rúmum 9 árum - í einu nútímavæðingarkasti fréttastofunnar. Ritstjóri hungurdiska hætti að flytja sjónvarpsveðurfréttir á sama tíma. Tilviljun?