Algjör nördun (aðrir ættu varla að lesa textann)

Stundum liggur ritstjóri hungurdiska út á jaðar þess áhugaverða. Svo er að þessu sinni og eru hinir almennu lesendur beðnir velvirðingar - þeir geta bara sleppt því að lesa meira.

Spurningin sem velt er upp er þessi: Í hversu mörg ár samfellt hefur ársmeðalhiti í Reykjavík hækkað - árið í ár verið hlýrra heldur en það í fyrra? Svarið er: Fjögur. Frá upphafi samfelldra mælinga hefur það gerst tvisvar sinnum að ársmeðalhitinn hefur hækkað í fjögur ár í röð. Það hefur gerst sjö sinnum að hann hefur hækkað þrjú ár í röð. Oftast skiptast á eitt til tvö ár í senn með hærri eða lægri hita heldur en í fyrra.

Við lítum á mynd sem sýnir fjögurra ára tímabil í keðju. Fjöldi formerkja á hverju tímabili er talinn. Mínusmerkin (kaldara en í fyrra) geta mest orðið fjögur - og plúsarnir líka mest fjórir. Oftast er fjöldinn núll eða tveir.

Tilvik þegar hiti hækkaði fjögur ár í röð eru eins og áður sagði tvö. Hið fyrra var þegar hitinn hoppaði upp úr versta 19. aldarástandinu á árunum 1887 til 1890. Hið síðara þegar við stukkum úr langvinnum kulda á árunum 2000 til 2003. Tvisvar hefur hitinn lækkað fjögur ár í röð, annars vegar 1916 til 1919 en hins vegar 1934 til 1937.

Við getum því heiðarlega sagt að það sé mjög óvenjulegt að hiti hækki fjögur ár í röð - og einstakt hækki hann (eða lækki) fimm ár í röð - við bíðum enn eftir því.

Hér er ekkert sagt um hversu mikil hækkun eða lækkun er. Í nítjándualdarhlýnuninni hækkaði hiti um 1,85 stig á fjórum árum, en í aldamótahlýnuninni okkar hækkaði hann um 1,59 stig á sama tíma.

Frá aldamótum síðustu (frá og með 2001 til 2012) hefur hiti hækkað um 1,02 stig (plúsasumman er 1,02 stig).

Athugasemdir

[Ómar Ragnarsson, 6.9.2013 kl. 10:34]

Ef þetta er "algjör nördun" hjá þér þá erum við að minnsta kostit tveir, sem föllum undir það hugtak.

[Sigurður Þór Guðjónsson, 6.9.2013 kl. 12:09]

Í árslok 1937 hefðu sumir átt að vera alveg óðir í sannfæringu sinni um það að veðurfar færi heldur betur kólnandi!

[Emil Hannes Valgeirsson, 6.9.2013 kl. 12:50]

Kannski mætti segja að ekki getur vont versnað eða gott batnað lengi.

[Hilmar Hafsteinsson (IP-tala skráð) 6.9.2013 kl. 13:34]

"Frá aldamótum síðustu (frá og með 2001 til 2012) hefur hiti hækkað um 1,02 stig (plúsasumman er 1,02 stig)."(sic)

Trausti Jónsson fer á kostum í óðahlýnunarútreikningunum. Spurning hvort efsta hæðin hjá Veðurstofu Íslands í Öskjuhlíðinni lendi fyrir ofan eða neðan sjávarmál um næstu aldamót með þessum útreikningum?

Í þessu sambandi er rétt að geta þess að tímabilið frá(og með) 2001 - 2012 er meðaltal ársmeðaltala í Reykjavík 5,5°C. Á þessu tímabili hefur nákvæmlega engin hlýnun átt sér stað í höfuðborg allra landsmanna á ársgrundvelli. . . :)

Það fer að verða spurning hvort umhverfisráðuneytið hafi látið óháða aðila yfirfara skýrslu vísindanefndar um loftslagsbreytingar 2008?

[Gunnar Th. Gunnarsson, 6.9.2013 kl. 15:29]

Athyglisvert... og tek undir með Ómari, ekkert svo nördalegt  Það kemur mér reyndar á óvart hvað hlýnunartrendið er ómerkilegt að sjá á línuritinu.

Ég vona að það valdi ekki svefntruflunum hjá sumum

[Trausti Jónsson, 8.9.2013 kl. 01:19]

Ómar - nördin leynast víða.