Hitabylgja í Bandaríkjunum suðvestanverðum

Fimmtíu stig á Selsíus-hitakvarðanum (°C) jafngilda 122 stigum á Fahrenheit. Þetta er ekkert venjuleg tala, en sést þó stundum. Þar á meðal þessa dagana í suðvestanverðum Bandaríkjunum. Ekki verður vitað fyrr en eftirá hversu hátt hitinn mun fara næstu daga - en sumir eru farnir að tala um 55 stigin. Það eru laugardagur og sunnudagur sem eru líklegastir til slíkra afreka.

Við lítum á hefðbundið háloftakort sem sýnir hæð 500 hPa-flatarins og þykktina á þessum slóðum.

Lesendur átta sig vonandi á landafræðinni. Sjá má Flórída og Kúbu neðantil til hægri og Suður-Grænland lengst uppi til hægri. Jafnhæðarlínur eru heildregnar á 60 metra bili, sú hæsta sýnir 5940 metra. Svo vill til að það er um það bil það mesta sem sést hefur hér við land. Þykktin er sýnd með litaflötum - við munum aldrei sjá hana verða svona mikla nærri okkur.

Litlu svörtu blettirnir sýna svæði þar sem þykktin er meiri en 5940 metrar. Sé loft mjög þurrt og sól hátt á lofti á heiðskírum himni eru 50 stigin líkleg. En muna þarf að hitinn fellur þá líka gríðarhratt að næturlagi þannig að bilið sem sólin þarf að vinna upp á kvarðanum er gríðarbreitt. - Sannleikurinn er sá að helst þarf vindur að blása af fjöllum til þess að næturhitahvörfin blandist hratt upp.

Ritstjóri hungurdiska hefur enga reynslu í að fást við svona mikla þykkt og enn síður hefur hann reynslu af staðháttum undir svarta blettinum - því þeir ráða svo miklu.

Þykkt af þessu tagi sést helst yfir Miðausturlöndum, Íran og Pakistan og þar hefur hún náð 6 kílómetrum. Sömuleiðis mun þykktin hafa náð 6 km í augum öflugra fellibylja - en raki og ský koma í veg fyrir að hiti þar verði mjög hár við sjávarmál.

Sést hefur í fréttum að veðurvitar sjái glitta í nýtt hitaheimsmet í Dauðadal í Kaliforníu - en sá góði staður á núgildandi heimsmet 56,7°C, 134°F. Það er reyndar vafasamt að mati ritstjóra hungurdiska. Hann er ekki einn um þá skoðun - en það er bara skoðun. Hvað um það - allt yfir 53 stigum telst til tíðinda - jafnvel í dalnum heita.

Á meðan þessu vindur fram sitjum við í kuldapollagarðinum miðjum og sjáum varla hærri hita á landinu en 14 til 16 stig - ekkert lát sést á því ástandi.

Athugasemdir

[Hilmar Hafsteinsson (IP-tala skráð) 29.6.2013 kl. 16:28]

Á meðan heldur áfram að kólna á Suðurheimskautinu :)

Gervitunglamælingar sýna fram á að sl. 33 ár hefur heldur kólnað á Suðurheimskautinu (http://stevengoddard.wordpress.com/2013/05/10/no-warming-in-antarctica-since-the-start-of-satellite-records/) og nýjar rannsóknir sýna fram á að áætluð hækkun sjávarstöðu við Suðurheimskautið er 70% (sjötíuprósent) minni en IPCC hefur haldið fram (http://hockeyschtick.blogspot.com/2013/05/new-paper-finds-upper-limit-of-sea.html).

Skyldi "tveggja manna makinn" vita af þessu? ;)