Hæðin hörfar

Nú er útlit fyrir að hæðin sem hefur ráðið veðri hér síðustu vikuna sé að gefa eftir. Hún hörfar til vesturs undan leiðindakuldalægð úr norðri. - En ekki þó fyrr en á mánudag eða aðfaranótt þriðjudags.

Þetta kort sýnir hæð 500 hPa-flatarins (heildregnar svartar línur), þykktina (rauðar strikalínur) og iðu (bleik og bleikgráir borðar og hnútar).

Í framhjáhlaupi er rétt að minnast á lægðina miklu langt suðvestur í hafi. Hún varð til á sunnudagskvöld við samruna hlýja loftsins úr hitabeltisstorminum Beryl og lægðardrags (iðuhnúts) úr sem kom suðaustur yfir Nýfundnaland. Lægðinni er spáð niður í 965 hPa (eða neðar). Það er óvenju lágur þrýstingur í júníbyrjun. Þetta kerfi kemur ekki við sögu hérlendis næstu daga að minnsta kosti.

En á sunnudag (þegar kortið gildir) er hæðin enn býsna öflug en þykktartölur farnar að lækka yfir Íslandi. Fyrir norðaustan land er háloftalægð sem dylst vel á venjulegum veðurkortum. Hún er samt það veðurkerfi sem okkur kemur mest við á kortinu því hún hreyfist beint í átt til landsins. Ef vel er að gáð sjáum við að innsta jafnþykktarlínan (rauðstrikuð) sýnir 5280 metra og kjarnakuldinn er enn meiri eða um 5230 metrar.

Rætist þessi spá mun snjóa niður á heiðar á norðan- og austanverðu landinu þegar kaldasta loftið fer hjá. Ekki er enn tímabært að fjalla meira um það - spár rætast ekki alltaf. - En hæðin hörfar til vesturs.

Annars hefur verið ansi kuldalegt við norðaustur- og austurströndina þessa síðustu daga og næturfrost allvíða. Að sögn (óstaðfestar fréttir) mun sjávarhiti vera talsvert undir meðallagi úti af Austurlandi.

Athugasemdir

[Ben.Ax. (Benedikt Jóhannes Axelsson), 3.6.2012 kl. 18:43]

Sæll. Nú er ég kominn heim og get því ekkert sagt um veðrið í Gautaborg lengur. En mig langar til að spyrja þig af því að ég er áttavilltur hér fyrir sunnan hvort Esjan sé ekki örugglega í norður séð úr Breiðholtinu. Þegar klukkuna vantaði tuttugu og fimm mínútur í tvö í dag fórum við feðgar út að ganga og fannst piltinum, sem er hjartalaus, anda köldu í okkar garð og vildi vita hvaðan vindurinn blési. Ég gat ekki svarað því en fannst hann vera að suðvestan. Getur það verið rétt og hvaða átt er hlýjust hér í Reykjavík og hvers vegna?

Kveðja

[Trausti Jónsson, 4.6.2012 kl. 01:00]

Jú, Esjan er í norðri. Á Veðurstofutúni var lengst af vestanátt í dag, jafnvel vestnorðvestan, beint utan af Flóanum. Hafgolan er sjaldan hlý, ætli hitinn í dag hafi ekki verið 12 til 13 stig. Sunnanátt er hýjust átta hér í Reykjavík nærri því allt árið. Eina undantekningin er á daginn á sumrin þegar austan- og suðaustanátt eru stundum hlýrri því þá nýtur stundum sólar. Norðaustanátt getur líka verið furðuhlý að deginum í sólskini á sumrin í Reykjavík - en það er undantekning.