Lágmörk og hámörk talin

Googleþýðarinn góðkunni gefur upp dulspekilegur fyrir alþjóðaorðið esoteric. Sú þýðing á varla við hér en samt er það þannig að veðurnördin eiga sín innfræðisem öðrum eru mjög hulin. Hin ágæta ensk-íslenska orðabók Geirs Zoega frá 1911 þýðir orðið sem heimullegur, það er nær lagi. Pistill dagsins er svoleiðis - úr heimullegum veðurnördaheimi. Aðrir hafi biðlund.

Síðastliðin nótt (aðfaranótt miðvikudagsins 16. maí) var mjög köld á landinu. Þótt dægurmet landsins þann 16. virðist í fljótu bragði ekki hafa fallið eru tölurnar óvenju lágar miðað við miðjan maí. Kuldinn skilar sér vel í talningum á dægurmetum einstakra stöðva, en til er skrá um þau fyrir sjálfvirku stöðvarnar - frá 1994 og einnig fyrir mannaðar stöðvar. Gallinn er sá að mönnuðu stöðvunum fer nú fækkandi.

Margar sjálfvirku stöðvanna hafa aðeins athugað í örfá ár en þó eru nærri 100 sem eiga nú 10 ára samfelldan rekstur eða lengri tíma. Við teljum nú dægurmet á öllum þessum stöðvum, bæði lágmarks- og hámarksmet sem sett hafa verið á árunum 2011 og 2012.

Dagurinn í dag (miðvikudagur 16. maí) er kominn með að minnsta kosti 43 ný lágmarkshitamet á sjálfvirkum stöðvum sem athugað hafa í að minnsta kosti 10 ár. Er það mikið? Já, það er býsna mikið. Hretið í maí í fyrra (2011) átti mest 16 dægurmet, það var bæði þann 17. og 31. Ahugasamir geta séð alla töfluna í viðhenginu hér að neðan. 

Þar má sjá að kuldarnir í fyrravor (2011) náðu hámarki þann 7. júní - þá voru sett 45 dægurlágmarksmet. Júnímánuður allur átti samtals 262 slík met, en nú er maí nú þegar kominn upp í 320 - rétt rúmlega hálfnaður. Í viðhenginu má sjá að kuldakastið í byrjun desember var það skæðasta síðastu 16 mánuðina. Metaflestur varð sá 9. með 69 dægurmet. Desember allur gaf alls 438 lágmarksmet - að þessu tali. Spurning er hvort maí í ár nær að toppa það. Ef 40 til 50 met verða sett í nú nótt (og þar með trúlega dægurmet fyrir allt landið) verður mánuðurinn kominn upp í um 370 og ekki þarf mjög marga slíka daga í viðbót til að ná desembertölunni.

Nú svo má einnig í viðhenginu finna sambærilegan lista yfir dægurhámarksmetin. Þar má t.d. sjá að 6. og 7. febrúar á þessu ári náðu samtals 143 hitametum. Hinn kaldi desember átti aðeins tvö. Júní í fyrra átti aðeins 18 og nú er maí heldur rislágur með aðeins 21 hámarkshitamet. Það bætir nær örugglega í það til loka mánaðarins.

Esotería, innfræði, svo sannarlega.

Skrár tengdar þessari bloggfærslu:

• metafjöldi

Athugasemdir

[Sigurður Þór Guðjónsson, 17.5.2012 kl. 01:50]

Á hér ekki við nýja orðatiltækið: innmúraðir og innvígðir. Og ansi held ég að það sé nú skrýtinn söfnuður!

[Þorkell Guðbrandsson (IP-tala skráð) 17.5.2012 kl. 05:21]

Sigurður Þór; Við erum ekkert skrítnir, það eru hinir sem eru það.

[Hilmar Hafsteinsson (IP-tala skráð) 17.5.2012 kl. 08:56]

Óborganleg lesning fyrir kolefniskirkjutrúboðsrugludallana:

"Þar má sjá að kuldarnir í fyrravor (2011) náðu hámarki þann 7. júní - þá voru sett 45 dægurlágmarksmet. Júnímánuður allur átti samtals 262 slík met, en nú er maí nú þegar kominn upp í 320 - rétt rúmlega hálfnaður. Í viðhenginu má sjá að kuldakastið í byrjun desember var það skæðasta síðastu 16 mánuðina. Metaflestur varð sá 9. með 69 dægurmet. Desember allur gaf alls 438 lágmarksmet - að þessu tali. Spurning er hvort maí í ár nær að toppa það. Ef 40 til 50 met verða sett í nú nótt (og þar með trúlega dægurmet fyrir allt landið) verður mánuðurinn kominn upp í um 370 og ekki þarf mjög marga slíka daga í viðbót til að ná desembertölunni".

Global warming - hvað?

[Emil Hannes Valgeirsson, 17.5.2012 kl. 09:56]

Hilmar, þú ert alltaf jafn langt frá því að skilja hvað hugtakið Global warming þýðir.

[Pálmi Freyr Óskarsson, 17.5.2012 kl. 16:13]

Hilmar: Á síðustu árum hefur verið gífurleg bæting á sjálfvirkum veðurstöðvum og þar af leiðandi meiri líkur á metum. Svo verður þú að hafa vit á að nota meðaltalshita ef maður á taka mark á gagnrýni þína á global warming. Smá kuldakast eða hitabylgja (þekkir sjálfsagt ekki orðið hitabylgja) segir lítið sem ekkert til um það hvort það er að kólna eða hitna.

[Sigurður Þór Guðjónsson, 17.5.2012 kl. 16:20]

Hvað þýðir annars þetta Global Warming?

[Hilmar Hafsteinsson (IP-tala skráð) 17.5.2012 kl. 17:27]

Emil Hannes Valgeirsson, 17.5.2012 kl. 09:56: ... og þú ert alltaf jafn langt frá því að skilja hvað hugtakið skilningur þýðir, elsku dúllan mín.

Pálmi Freyr Óskarsson, 17.5.2012 kl. 16:1: Reyndar hefur veðurstöðvum fækkað verulega um allan heim á síðustu áratugum og deilt er um nákvæmni/áreiðanleika hitamælinga mtt. staðsetningar. Annars vil ég biðja þig vinsamlegast að kynna þér vandlega ágæt gögn Trausta sem fylgja með bloggfærslunni. Úps... það er að k ó l n a á Íslandi.

Sigurður Þór Guðjónsson, 17.5.2012 kl. 16:20: Tek að sjálfsögðu undir með yfirnerði íslenskrar veðurrýni: "Hvað þýðir annars þetta Global Warming?" ORG og Al Gore og hinar mörgæsirnar á Suðurpólnum?

[Emil Hannes Valgeirsson, 17.5.2012 kl. 17:44]

Global Warming þýðir hnattræn hlýnun. Mér finnst ég annars hafa ágætan skilning á skilningi og misskilningi að ógleymdum réttum og röngum misskilningi.

[Hilmar Hafsteinsson (IP-tala skráð) 17.5.2012 kl. 19:51]

Emil Hannes Valgeirsson, 17.5.2012 kl. 17:44: Eigum við nú ekki að vera sammála um skilgreiningar félagi? Global warming er hugtak sem heimsendaspámenn básúna um heimsbyggðina og byggist á [áætlaðri] 0,7°C hlýnun meðalhitastigs jarðar frá aldamótum 1900(!) Á Kelvinskala (og reyndar í ljósi líffræði/jarðfræði) er þessi meinta "skelfilega" hlýnun ekkert annað og meira en suð (noise) á vísindalegum mælikvarða.

Ein ágæt spurning til ykkar kolefniskappanna: "Hve lengi þurfa kolefniskirkjutrúboðar að fylgjast með eðlilegum breytileika loftslags á jörðu áður en þeir viðurkenna loksins að þeir hafa verið að fylgjast með eðlilegum breytileika loftslags?

[Pálmi Freyr Óskarsson, 17.5.2012 kl. 20:09]

Hilmar: Rangt hjá þér að veðurstöðvum hefur fækkað, nema að þú sért að meina mannaðar veðurstöðvar, þá erum við veðurathugunarmenn deyjandi stétt.

Hitamælar Veðurstofurnar eru flestir staðlaðir þannig sem minnst trufli þá. Þannig að hitatölur ættu að vera nokkuð nákvæmar/áreiðinlegar. Enn til að vera enn nákvæmari er betra að nota meðaltal til þess að vita hvort það sé að kólna eða hitna. Þú virðist ekki nokkuð móti eða vilja skilja það.

Gögn Trausta eru ansi takmörkuð til að sanna að það sé að kólna. Þar sem það hefur fjölgað svo gífurlega sjálfvirkum veðurstöðvum á nokkrum árum.

[Emil Hannes Valgeirsson, 17.5.2012 kl. 21:41]

Sammála um að Global warming snýst um hækkun á meðalhita jarðar og það á löngu tímabili, eins og 0,7 stig á einni öld gefur til kynna.

Þess vegna hefur þessi bloggfærsla Trausta ekkert með Global warming að gera enda fjallar hún bara um Ísland en ekki alla jörðina og ekki einu sinni um meðaltöl eins og Pálmi hefur verið að benda á.

Ég er ekki sammála að Global warming byggist á þeirri hlýnun sem þegar hefur orðið því búið var að segja fyrir um hlýnun jarðar á fyrri hluta 20. aldar vegna aukins útblásturs CO2. Global warming er því ekki eftiráskýring heldur miklu frekar spádómur sem hefur ræst. Ennþá er kannski einhver möguleiki á að hlýnunin sé af náttúrulegum völdum og hrein tilviljun að spár um hlýnun gengu eftir.

[Kristinn Pétursson, 17.5.2012 kl. 22:38]

Global Warming hvað?  

[Emil Hannes Valgeirsson, 17.5.2012 kl. 22:56]

Svo eru auðvitað sumir sem viðurkenna ekki að hlýnað hafi á jörðinni. En hvað um það, næstu daga fáum við að öllum líkindum ágætis Local Warming hér hjá okkur, öllum til mikillar gleði.

[Sigurður Þór Guðjónsson, 18.5.2012 kl. 00:42]

Já, þetta er sko skrýtinn söfnuður! Farið það nú alveg í kolað!