Hlýjustu og köldustu ágústdagarnir - landið allt

Hér er fjallað um hlýjustu og köldustu ágústdaga. Athugunin nær aðeins aftur til 1949 rétt eins og sambærileg athugun sem gerð var á júlímánuði hér á hungurdiskum þann 26. júlí.

Fyrst eru þeir tíu dagar þar sem meðalhiti sólarhringsins fyrir landið allt er hæstur í °C.

ár	mán	dagur		meðaltal
2004	8	11		15,90
2004	8	10		15,53
2010	8	15		14,94
2004	8	9		14,30
2003	8	9		14,04
2010	8	12		13,84
2003	8	25		13,83
1995	8	10		13,80
2008	8	1		13,80
1981	8	27		13,70

Tveir hlýjustu dagarnir og sá fjórði hlýjasti eru allir úr hitabylgjunni miklu 2004. Í júlípistlinum kom fram að 11. ágúst 2004 er hlýjasti dagur landsins þótt miðað sé við allt árið. Það kemur á óvart að 8 dagar af tíu eru frá frá 2003 og síðar. Þetta er langt yfir væntigildi, áratugirnir í gagnasafninu eru rúmlega sex og síðustu tíu árin hefðu aðeins átt að eiga 1 eða 2 daga. Hér sést enn hversu óvenjulegur ágústmánuður hefur verið á síðustu árum.

Síðan koma þeir tíu dagar þegar meðalhámark var hæst.

ár	mán	dagur		meðaltal
2004	8	11		21,55
2004	8	10		20,44
2004	8	13		20,40
2004	8	14		19,72
1980	8	1		19,32
2004	8	12		19,29
2004	8	9		18,39
1997	8	13		18,30
2008	8	1		18,07
1997	8	12		18,06

Það hefur aðeins gerst örfáum sinnum að meðalhámarkhiti á landinu sé meiri en 20 stig. Hitabylgjan 2004 á hér sex daga af tíu. Talan frá 1. ágúst 1980 er undir örlítið fölsku flaggi því hún fær aðstoð frá síðdeginu og kvöldinu áður, 31. júlí. Hér skorar hitabylgjan í ágúst 1997 líka vel. Hún var sérstaklega hitagæf á hálendinu. Ég hef ekki reiknað meðaltöl fyrir hálendið sérstaklega.

Við látum hæsta meðallágmarkið fylgja með. Það er mælikvarði á hlýjar nætur. Algengt er að hlýjasta nótt ársins sé í ágúst og hefur einnig verið í september.

ár	mán	dagur		meðaltal
2010	8	15		12,73
2003	8	25		11,94
2010	8	13		11,88
1995	8	10		11,54
2003	8	9		11,54
2004	8	11		11,41
1995	8	11		11,35
2009	8	6		11,26
2010	8	14		11,23
2004	8	3		11,12

Þetta eru nýlegar tölur, þrjár ágústnætur á síðasta ári eru á listanum þar á meðal sú hlýjasta. Ágústmánuður í ár hefur ekki verið líklegur til stórræða enn sem komið er.

Við skautum líka yfir kuldana, en lengri töflur eru í viðhenginu.

Lægsti meðalhiti ágústdags:

ár	mán	dagur		meðaltal
1956	8	27		4,49

Meðalhiti landsins alls var ekki nema 4,5 stig þann 27. ágúst 1956 - enda voru sett kuldamet víðs vegar um land.

Sami dagur á lægsta landsmeðallágmarkið

ár	mán	dagur		meðaltal
1956	8	27		0,70

Það var 0,7 stig.

Og að lokum lægsti landsmeðalhámarkshiti

ár	mán	dagur		meðaltal
1977	8	31		7,21

Haustið kom óvenju snögglega 1977. Hitabylgja hafði gengið yfir um miðjan mánuð - ein af bestu hitabylgjum ágústmánaðar. Þann 27. gerði mikið illviðri af suðaustri. Það var sérstakt fyrir það hversu mikið af trjám brotnaði enda þung af laufi. Allt í einu var komið haust og það staðfestist næstu daga með næturfrostum og snjó á fjöllum. En haustið varð samt hagstætt úr því - en það var haust en ekki sumar.

Skrár tengdar þessari bloggfærslu:

• hlýir og kaldir dagar í ágúst

Athugasemdir

[Þorkell Guðbrandsson (IP-tala skráð) 15.8.2011 kl. 17:36]

Þökkum þennan fróðleik. Stöðugt bætist við í bankann og sífellt lærir maður meira. Ef ég er ekki að misskilja því meira (sem getur jú vel verið!) þá vekur það athygli mína að síðari hluti sjöunda áratugarins, þ.e. árin frá 1966 til og með 1970, koma ekkert sérstaklega sterkt fram í lágmörkum. Í minni okkar, sem vorum á virkasta lífaldri á þeim tíma, voru þessi ár ansi köld og kom það víða fram, ekki síst varðandi allan jarðargróður. Mér eru t.d. afskaplega minnisstæð sumrin 1968 og 1969 fyrir þessar sakir. Í júlí 1969 snjóaði í fjöll í nær öllum vikum sumarsins og frostnætur þó nokkrar, þrátt fyrir langan sólargang á þessum árstíma. Þá spyr maður sjálfan sig hvort svikult veðurminni sé að blekkja mann? Voru t.d. orsakir gríðarlegs kals í túnum ekkert síður af völdum rangrar áburðarnotkunar, óheppilegrar samsetningar frætegunda við túnræktun, skorts á réttri tækni við að "kýfa" slétturnar þannig að þær veittu af sér leysingarvatni að vetrum til viðbótar við að hin gríðarmikla sókn í þurrkað votlendi til túnræktunar leiddi af sér alltof súran jarðveg fyrir túngrös? Ekki ætlast ég til að fá svör hjá þér við þessu, Trausti, það væri ósanngjarnt enda veðurfræðin ekki rétta greinin til að svara slíkum spurningum.

[Trausti Jónsson, 16.8.2011 kl. 01:10]

Þorkell, veðurminni þitt er ábyggilega gott - enda punktar þú í dagbók - er það ekki? Ágústmánuðir áranna 1966 til 1970 voru ekki kaldir, fyrri mánuðir sumarsins voru það hins vegar margir. Mikill munur var á veðurgæðum septembermánaðanna 1968 og 1969, hinn fyrri með ólíkindum hlýr og góður en sá síðari alveg sérlega leiðinlegur og kaldur. Ég get ekki dæmt um orsakir kalsins mikla sem plagaði menn á þessum árum - en áfreðar voru mjög miklir. Sjálfsagt hefur fleira komið til. Það er mér bara minnisstætt þegar Húnvetningar komu suður og slógu hluta Hvanneyrarengja sem ég man ekki til að hafi verið nýttar síðan til heyöflunar.

[Þorkell Guðbrandsson (IP-tala skráð) 16.8.2011 kl. 21:02]

Því miður ná veðurdagbækur mínar ekki nema 10 ár aftur í tímann. Hefði betur byrjað á þessu fyrr!