Hæðarhryggurinn mildi þokast austur og deyr

Norðanlands hefur enn andað af norðri þannig að íbúar landshlutans hafa lítt notið hins milda hæðarhryggjar sem yfir landinu hefur verið. Nú á hryggurinn að þokast austur - það eru góðar fréttir fyrir norðlendinga - en svo virðist sem næsta lægð straui hann flatan. Kortið sýnir norðurhvelsstandið eins og evrópureiknimiðstöðin spáir því um hádegi á þriðjudag.

Fastir lesendur kannast vonandi við kortið, það sýnir hæð 500 hPa-flatarins og má sjá norðurhvel langleiðina suður að hvarfbaug, höfin eru blá, löndin ljósbrún. Ísland er neðan við miðja mynd. Bláu og rauðu línurnar eru hæð 500 hPa-flatarins í dekametrum (1 dam = 10 metrar). Því þéttari sem línurnar eru því meiri er vindurinn milli þeirra. Þykka, rauða línan markar 5460 metra hæð, en sú þunna sýnir hæðina 5820 metra.

Ég hef merkt inn helstu lægðir og nokkrar hæðir og sömuleiðis reyni ég að sýna hæðarhrygginn með grænni punktalínu sem liggur til vesturs og suðurs frá Íslandi. Á þriðjudaginn verður nokkuð myndarleg lægð suðaustan Grænlands og stuggar hún hryggnum til austurs og bælir hann síðan. En meðan það gerist ætti að hlýna norðanlands. Næsta lægðardrag (það sem á kortinu er yfir Labrador) fer hratt austur. Liggi leið þess til austurs fyrir sunnan land mun nýr hæðarhryggur byggjast upp yfir Grænlandi í kjölfarið - það er þó ekki víst.

Þann 13. júlí byrja hundadagar, að sögn kenndir stjörnumerkinu Stóra-Hundi með Hundastjörnuna sjálfa, Síríus,  í fararbroddi. Þetta er sá tími árs þar sem 5820 metra þykktarlínan er að jafnaði í sinni norðlægustu stöðu við Miðjarðarhaf. Stöku sinnum sér Miðjarðarhaf jafnvel næstu línu fyrir ofan, 5880 metra í boði Saharaeyðimerkurinnar eða Miðausturlanda. Rómverjar hinir fornu vissu víst lítið um þykktarlínur - en hafa ábyggilega þekkt þær samt - alla vega brjáluðust hundar af þykktinni miklu.  

Fyrir 20 til 30 árum - meðan veðurfar lá í öðrum farvegi heldur en hin síðari ár var upphaf hundadaga kvíðatími á Suður- og Vesturlandi - skyldi hann leggjast í rigningar? Á sama tíma greip von um hlýja laufvinda norð- og austlendinga. Enda ríktu endalaus rigningasumur sunnanlands. En skiptir um veðurlag nú? Ekki spá hungurdiskar neinu um það.

Athugasemdir

[Þorkell Guðbrandsson (IP-tala skráð) 11.7.2011 kl. 09:48]

Hundadagakenningin er með skemmtilegri pælingum úr alþýðlegum veður"vísindum". Á þessum tíma, þ.e. frá því um það bil 13. júlí til og með um það bil 23. ágúst, er væntanlega talsverð tregða í veðurfari almennt, eða hvað? En kumpánarnir sem búa til kortin hjá wetterzentrale.de eru ekki í vafa um að frá og með næstu helgi kólni verulega hér á norðanverðu Atlantshafi. Ef spár þeirra rætast, gæti jafnvel snjóað í fjöll hér norðanlands um miðja vikuna. En, eins og Trausti hefur marg tekið fram, spár eru bara spár og því óábyggilegri sem þær ná lengra fram í tímann.

[Trausti Jónsson, 12.7.2011 kl. 02:12]

Spár eru bara spár og norðanáttin dettur inn og út úr tölvuspánum þar til nær dregur.