Mynd af páskalægðinni

Þótt myndir berist nú stöðugt frá gervihnöttum eru þær af misjöfnum gæðum - en maður þakkar þó fyrir það sem er. Skásta myndin sem ég fann af páskalægðinni var höluð niður í Dundee í Skotlandi fyrr í kvöld (laugardagskvöldið 23. apríl) og verð því að notast við hana. Mun betri mynd veður vonandi fáanleg seint í nótt (en þá verð ég löngu farinn að sofa).

Myndin var tekin klukkan 20 að kvöldi 23. apríl, útlínur Íslands og Grænlands eru merktar inn á myndina. Þetta er hitamynd, því hvítari sem skýin eru því kaldari og hærri eru þau. Meginskýjabakkinn er yfir Íslandi og undir honum er austanillviðri með rigningu eða slyddu (snjókomu til fjalla). Þegar þetta er skrifað (uppúr miðnætti) er þessi bakki kominn langleiðina norður af og skýlitla svæðið tekið við. Þar eru skúraklakkar á stangli þar sem uppstreymi hefur tekist að brjótast í gegnum teppi af hlýju niðurstreymislofti sem liggur ofan á.

Lægðarmiðjan er ekki fjarri suðvesturjaðri þessa skýlitla svæðis. Skammt sunnan við hana eru tveir krókar eða sveipir. Ég ætla ekki að ræða uppruna þeirra hér en krókar af þessu tagi koma og fara, en ganga hver á fætur öðrum kringum lægðarmiðjuna og vefjast smám saman alveg kringum hana.

Veðrið er trúlega verst austan við austari krókinn sem merktur er á myndina. Nú er engar vindmælingar að hafa frá þessu svæði. Slík staða er óþægileg í meira lagi og verður að treysta á tölvuspár sem nær aldrei eru alveg samhljóða. Síðan er að fylgjast með vindhraða, vindátt og loftþrýstingi í Grindavík, Keflavíkurflugvelli og á Garðskagavita og bera þær upplýsingar saman við myndirnar sem berast frá sístöðuhnettinum yfir miðbaug. Þær myndir hafa þann kost að koma oft en þann ókost að þær eru ekki mjög greinilegar hér á norðurslóðum. Þær má þó nota til samaburðar við ratsjármyndirnar, en því miður er vindhraðamælieining veðursjárinnar á Miðnesheiði biluð sem stendur.  

Já, bláa örin á myndinni sýnir áætlaða braut smákuldapolls sem enn er vestan Grænlands en á að styrkja og kæla suðvestanáttina hér á landi annað kvöld og aðra nótt. Ekki er það sérstakt áhyggjuefni að öðru leyti en því að hálkan gæti heimsótt okkur aftur skamma stund. Varla þarf að taka fram að veður er langoftast mun verra á fjallvegum heldur en á láglendi. Það ætti að vera almenn regla ferðamanna að líta á vef Vegagerðarinnar þegar ekið er um heiðar, ekki aðeins þegar spáð er illu eins og nú er, heldur yfirleitt. Sömuleiðis að líta á vef Veðurstofunnar, þar eru nýjustu spárnar.

Athugasemdir

[Sigurgeir Fr. Ólafsson (IP-tala skráð) 24.4.2011 kl. 23:49]

Hvað er að gerast með veðrið?

Veðrið hefur verið hreint út sagt ömurlegt þessa páska. 

Enn eru endalausar s/v-lægðir með éljum og maí er í næstu viku.

Samkvæmt dagatalinu er sumarið löngu komið, en ekkert bólar á sumarveðrinu.  Var einhver að tala um "global warming"?
Alla vegana er þetta eitthvað sem er á undanhaldi hér á landi.

Á meðan mun apríl slá öll met í Bretlandi hvað sól og hita varðar, og sumarið er löngu komið í Evrópu.  Aftur á móti herðir veturinn bara tökin hér á landi, og það er ekkert fararsnið á honum.

Þetta hlýtur að vera sólarminnsti apríl í háa herrans tíð og úrkoman er sennilega í meira lagi.  Páskarnir eru seint í ár, svo varla er hægt að bera þessa páska saman við páska hér áður fyrr.  Kannski við páska hér á árunum fyrir 1900.

Ég tel þetta verðurlag mjög óvenjulegt.  Búið að vera s/v hvassviðri og úrkomusamt meira eða minna allt þetta ár, og ekkert bendir til þess að þetta fari að breytast.  Amk. gera allar langtímaspár ekki ráð fyrir því.

[Trausti Jónsson, 25.4.2011 kl. 01:22]

Þakka athugasemdina Sigurgeir. Úrkoma það sem af er mánuðinum er í meira lagi hér á Suður- og Vesturlandi, en hitinn er vel yfir meðallagi - meira að segja í Reykjavík. Óvenjuleg hlýindi hafa verið um landið norðaustan- og austanvert. Þeir dæmigerðu vordagar með sólskini og hita sunnan undir vegg (en kulda í forsælunni) hafa verið fáir nú í apríl hér í Reykjavík og skakviðri hafa vissulega verið með meira móti. Við bíðum auðvitað öll spennt eftir sumrinu og rétt eins og alltaf að grípa þá daga sem gefast.