Er hitametahrinan liðin hjá?

Metahrinu dagsins hafa verið gerð ágæt skil á bloggi Sigurðar Þórs Guðjónssonar og verður það sem þar stendur ekki endurtekið hér. Yfirlit kemur vonandi á vef Veðurstofunnar þegar hrinan er örugglega liðin hjá.

En er hún liðin hjá nú þegar? Hið fádæma hlýja loft sem verið hefur yfir landinu undanfarna þrjá daga eða svo er að komast norður af og við tekur loft sem er um það bil 5 stigum kaldara. Það eitt og sér gerir að ný met eru ólíkleg á morgun - sunnudag. Síðan hlýnar heldur aftur - en ekki verður um alveg jafn hlýtt loft að ræða og ríkt hefur undanfarna daga.

En við rétt skilyrði geta met þó enn fallið um vestan- og suðvestanvert landið. Septemberhitametið í Reykjavík er ekki nema rétt rúm 20 stig. Loftið um helgina kom hitanum norðanlands i nærri því 25 stig. Tveggja til fimm stigum kaldara loft getur þannig kreist hitann í Reykjavík upp í stigin 20, ef skilyrði eru hagstæð að öðru leyti.

Hver eru svo þau hagstæðu skilyrði? (a) Það verður að vera þurrt þegar hámarkið kemur. (b) Það verður helst að vera sólskin. (c) Áttin verður að vera nærri austri - helst aðeins norðan við það - þá nýtur niðurstreymis Esjunnar að einhverju leyti. (d) Það verður helst að vera almennt niðurstreymi yfir svæðinu - það tekst helst liggi þrýstilínur í hæðarbeygju.

Hvort þessum skilyrðum verði fullnægt næstu daga er erfitt um að spá. Þurrkur fylgir almennu niðurstreymi og því fylgir einatt sól og liðir (a), (b) og (d) eru því ekki alveg tölfræðilega óháðir. Það þrengir metagluggann að ekkert sólskin er að nóttu. Rétta vindáttin - verður hún til staðar ef hin atriðin verða það?

Þótt líkur á nýju Reykjavíkurmeti séu minni en fyrir nokkrum dögum eru þær ekki núll - e.t.v. sambærilegar við það að íslenska landsliðið í knattspyrnu vinni stórþjóð. Þar eru líkurnar ekki núll fyrr en leiknum er lokið. Þessum leik lýkur sennilega í bili um eða eftir miðja viku.

Athugasemdir

[Brynja (IP-tala skráð) 5.9.2010 kl. 01:34]

Einhverra hluta vegna spáði ég erfiðum vetri 2010-2011, en sú spá sá ég fyrir mér síðasta vor...   ég hélt að hlýindin undanfarin ár myndi koma okkur í koll loksins þetta árið, en svo virðist ekki vera raunin, alla vega ekki enn sem komið er :)

[Trausti Jónsson, 6.9.2010 kl. 00:25]

Hlýindi nú segja lítið um komandi vetur. En hlýindin eru nú búin að standa í 8 ár nánast alveg samfleytt - langt umfram það sem venjulegt er um hlýindakafla. Þau hljóta þó að taka enda - eða að minnsta kosti taka sér hlé.