Smávegis af apríl 2025

Apríl var hlýr hér á landi, rétt eins og febrúar og mars, en þó vantar aðeins upp á methlýindi. Taflan sýnir hvernig hiti á spásvæðunum raðast. Hún nær til 25 ára - í aprílpistli Veðurstofunnar má finna meðaltal og röðun á einstökum stöðvum.

Að tiltölu var hlýjast við Breiðafjörð þar sem þetta var næsthlýjasti apríl á öldinni, en talsvert hlýrra var í apríl 2019. Á öðrum spásvæðum er algengast að hitinn raðist í 3. til 5. hlýjasta sæti aldarinnar, á Austurlandi að Glettingi þó í sjötta sæti. Apríl 2019 er hlýjasti aprílmánuður aldarinnar á flestum spásvæðum, á Austurlandi að Glettingi og Austfjörðum er það 2011 og apríl 2003 á Suðausturlandi.

Kort evrópureiknimiðstöðvarinnar sýnir meðalhæð 500 hPa-flatarins (heildregnar línur), meðalþykkt (daufar strikalínur) og þykktarvik (litir). Hér á landi var þykktin 40 til 60 metrum yfir meðallagi, hiti var því 2,0 til 3,0 stig ofan meðallags í neðri hluta veðrahvolfs. Við megum taka eftir horninu á milli jafnhæðar- og jafnþykktarlína, sýnir hlýtt aðstreymi. 

Vestanáttin í háloftunum var heldur undir meðallagi, en sunnanáttin aftur á móti vel yfir því - eins og kortið sýnir. Svipuð vindastaða var uppi í apríl 2003, en þá voru hlýindin afmarkaðri á kortinu í heild heldur en nú. Sjá má að hlýindi eru um mestallt svæðið sem kortið sýnir, þykkt rétt undir meðallagi við Labrador. Leifar kuldapolla vetrarins eru fjarri, við sjáum þó í jaðar eins slíks efst til hægri á kortinu, hann snertir Norður-Noreg. Þar var óvenju kalt. Víða í Suður-Noregi var þetta hins vegar hlýjasti apríl mælisögunnar (þykktarvikin eru enn meiri en hér við land). Á Svalbarða var apríl hins vegar sá kaldasti í 16 ár (upplýsingar frá norsku veðurstofunni). 

Eins og áður sagði er þetta þriðji hlýi mánuðurinn í röð. Í yfirliti Veðurstofunnar (sjá vef hennar) er sagt frá því að meðalhitinn í Reykjavík fyrstu fjóra mánuði ársins sé sá fjórði hæsti frá upphafi mælinga. Sömu mánuðir 2003 voru nokkru hlýrri en nú, en 1964 og 1929 voru þeir talsvert hlýrri, hlýjast 1964. Ef við tökum aðeins síðustu þrjá mánuði, hækka þeir um eitt sæti á listanum, aðeins 1964 og 1929 eru hlýrri, 1929 nær efsta sætinu.

Svo verður auðvitað keppni með maí. Líklegast er að fimm mánaða meðaltalið verði ekki meðal þeirra fimm efstu, ekki þó ómögulegt. Það er þannig harla ólíklegt að maí einn og sér muni koma hitanum ofar á keppnislistum því það þarf 7,7 stig til að verjast ásókn ársins 2014, og tæp 8 stig til að ná þriðja sætinu úr höndum fyrstu fimm mánaða ársins 2003. Slíkt er rétt hugsanlegt að vísu, 8 stiga maí kom síðast í Reykjavík árið 2017. Til að ná öðru sætinu úr höndum ársins 1929 þarf hins vegar 10,5 stiga maí - sem ekki gerist, hlýjasti maí sem við vitum um í Reykjavík (1935) á 8,9 stig og til að ná 1964 þyrfti 13,3 stiga maí - fullkomlega fráleit tala. Janúar í ár - þó ekki væri hann sérlega kaldur - útilokar möguleika á margra mánaða methlýindum - hann er þungur í drætti. Fleiri mjög hlýir mánuðir mundu ná því um síðir, en verður þó að telja harla ólíklegt eins og staðan er.

Við þökkum BP fyrir kortagerðina - að vanda.