Ólíkar úrkomuspár

Ritstjóri hungurdiska var nú áðan í einhverju hálfgerðu rænuleysi að fletta spákortum og tók eftir því að lítilli úrkomu var spáð í Reykjavík næsta sólarhring, í framhaldinu leit hann líka á spárit evrópureiknimiðstöðvarinnar og hélt eitt augnablik að ritið hefði ekki endurnýjast - því þar stóð að líklegasta úrkoma á sama tíma yrði meiri en 10 mm og ein 50 safnspáa sagði úrkomuna verða 50 mm á einum sólarhring. Þessa misræmis gætti ekki á nálægum stöðvum, t.d. á Hvanneyri í Borgarfirði eða fyrir austan fjall. 

Þetta gefur tilefni til þess að líta á þessar spár á íslandskortum.

Eins og sjá má er ekki mikilli úrkomu spáð á landinu í ig-háupplausnarspá dönsku veðurstofunnar. Helst á venjulegum  úrkomustöðum þegar suðvestanátt ríkir - og allsamfellt úrkomusvæði er yfir Snæfellsnesi, Breiðafirði og hluta Vestfjarða - allt „eftir bókinni“. Háupplausnarlíkan Veðurstofunnar er nær alveg sammála, sömu svæði, en aðeins hærri tölur. 

Spá reiknimiðstöðvarinnar er hins vegar talsvert öðru vísi. 

Hér er kominn 35 mm blettur rétt við efri byggðir Reykjavíkur og sömuleiðis einkennilegir blettir hlémegin hárra fjalla, 27 mm í Ísafjarðardjúpi þar sem engin úrkoma var á fyrra kortinu, og úrkomusvæðið á Snæfellsnesi er hér áberandi norðan fjallgarðsins, en ekki á honum eins og á fyrra korti. Sunnanverðir Vestfirðir aftur á móti svipaðir. 

Við vitum að sjálfsögðu að þessi líkön eru mjög ólík, landslag er útjafnaðra hjá evrópurreiknimiðstöðinni heldur en í hinum líkönunum og að auki verður úrkoma til á ólíkan hátt í líkangerðunum tveimur - lóðréttur vindhraði er reiknaður á mjög ólíkan hátt.

Hér er hvorki rúm né ræna til að ræða þær tæknilegu ástæður sem kunna að liggja að baki þessum ótrúlega mun - aðeins bent á hann. Lærdómurinn kannski sá að stundum sé þess þörf að vera ekki steinsofandi við lestur á veðurspám.