Tveir litlir kuldapollar renna hjá

Nú renna tveir litlir kuldapollar hjá landinu úr norðri og norðaustri. Ekki gætir áhrifa þessa svo mjög við jörð - en það kólnar samt nokkuð og vindsperringur nær sér niður á stöku stað - sérstaklega á aðfaranótt laugardags. 

Kortið sýnir hæð 500 hPa kl.21 annað kvöld, föstudag (heildregnar línur), hita í fletinum (litir) og vindur er sýndur með hefðbundnum vindörvum. Háloftahæð er yfir Grænlandi, þar er hlýrra en umhverfis - lægðin sem olli illviðri á landinu í fyrradag bjó til þessa hæð. Afkomandi hennar veldur á morgun illviðri á Bretlandseyjum, hlýkjarnalægð á kortinu. 

En kuldi úr norðri stingur sér á milli þessara kerfa í líki tveggja lítilla háloftalægða. Örvarnar sýna hreyfingu þeirra frá hádegi í dag. - En flestum er sama.