Fyrirferðarmikil lægð

Alloft verða lægðir svo fyrirferðarmiklar að þær ná yfir mestallt N-Atlantshaf - og dæla um leið köldu lofti frá Kanada alveg austur um til Bretlands og langt norður í Ballarhaf. Þannig var það í dag (föstudag 6. mars).

Myndin er tekin kl.23 nú í kvöld (föstudag 6. mars) og kanadaloftið á eftir að hreinsa upp Bretlandseyjar norðanverðar - en mun gera það og lægðin verður þá nánast einráð ásamt afleggjaranum sem sjá má sem sérstakan sveip suður af Jan Mayen. Norðanstrengurinn við Norðaustur-Grænland þrjóskast þó enn við, leitar lags suður á bóginn - og á að slást inn á Vestfirði um tíma á morgun (laugardag) en ekki af neinu afli - og hörfar svo aftur undan útsynningsloftinu. 

Á milli Nýfundnalands og Suður-Grænlands má sjá skemmtilegan lægðarsveip sem snýst upp við jaðar norðvestanvindrastar. Hann sést vel í tölvulíkönum þrátt fyrir smæðina.

Hér má sjá sveipinn - mörk bleiku og bláu litanna er við 24 m/s - mikil snerpa hér á ferð. Nýfundnaland er við vinstri jaðar myndarinnar og efst sér rétt í Hvarf á Grænlandi. Sé reikningum trúandi mun sveipurinn fara til austsuðausturs - en ekki lifa alla leið til Skotlands - týnist í núningi við umhverfið þegar orkulindir þrýtur. 

Þetta kort sýnir sjávarmálsþrýsting (heildregnar jafnþrýstilínur) og hita í 850 hPa-fletinum um miðnætti á föstudagskvöld 6. mars. Hér sést stærð lægðarinnar vel og sömuleiðis kuldaskil sem liggja allt frá Noregi í austri til vestsuðvesturs allt vestur til suðurríkja Bandaríkjanna.

Varla er að sjá neina misfellu á skilunum - um leið og þau sveigjast eitthvað til vaxa líkur á myndun nýrra lægða. Reiknimiðstöðvar búa til margar misstórar á næstu dögum - þeim verður ýmist skotið á Grænlandshaf, Ísland, Færeyjar eða Bretlandseyjar. Hvort þær verða fjórar, fimm eða sjö næstu vikuna skiptir ekki miklu máli að svo stöddu - kannski best að þær verði svo margar að engin nái máli - en við getum haldið áfram að fylgjast spennt með. 

Lægðin stóra vestan við okkur sér þó um veðrið um helgina - útsynning aðallega með éljum um landið sunnan- og vestanvert - en bærilegasta veður ætti að verða norðaustanlands. Evrópureiknimiðstöðin sagði miðjuþrýsting lægðarinnar hafa farið niður í 940 hPa síðdegis - það er sérlega lágt í mars - ekki met að vísu - en samt. Lægsta tala dagsins á Íslandi sýnist vera 954,6 hPa á Gufuskálum. 

Í fyrrasumar voru reiknimiðstöðvar sífellt að gefa undir fótinn með hitabylgjur undir lok spásyrpa, á 8. til 10. degi - en aldrei komu þær. Síðustu daga hafa sömu reiknimiðstöðvar varið að veifa framan í okkur mikilli breytingu á veðurlagi - eftir 9. til 10. daga - en hætt svo við - hvað eftir annað. Það á auðvitað ekkert að vera að nefna þetta - en samt, en samt.