Vindhraði í vetur

Eins og fram kemur í febrúaryfirliti Veðurstofunnar var mánuðurinn óvenju vindasamur, meðalvindhraði virðist hafa verið sá mesti í febrúar síðan 1989 -. Sá mánuður var þó mun kaldari og snjóasamari heldur en sá nýliðni svo varla er saman að jafna. Engu að síður hafa vindar verið með stríðara móti í vetur - því er ekki að neita.

Við lítum til gamans á meðalvindhraða í byggðum landsins í desember, janúar og febrúar (alþjóðavetrarmánuðina) aftur til 1949 - án þess að taka málin of alvarlega.

Lárétti kvarðinn sýnir árin, talan 1950 nær yfir desember 1949 auk janúar- og febrúarmánaða 1950. Lóðrétti ásinn sýnir vindhraða. Gráu súlurnar marka vindhraða hvers alþjóðavetrar. Sjá má mikið hámark á árunum 1989 til 1995 og önnur heldur minni fyrr á tímabilinu. Síðustu tveir vetur eru líka hátt á kvarðanum. 

Meðalvindhraði var mestur alþjóðaveturinn 1992 til 1993 - en minnstur gæðaveturinn mikla 1963 til 1964. Rauða línan sýnir meðalvindhraða sjálfvirkra stöðva í byggð - lengst af aðeins meiri en í mannaða safninu. 

Græna línan markar 7-ára keðjumeðaltal - það hefur verið í miklu lágmarki undanfarin ár - þar til að veturinn í fyrra fer að lyfta því aftur og veturinn í vetur ítrekar það. 

Hvað verður svo á næstu árum vitum við ekkert um - ekki einu sinni hvernig nýhafinn marsmánuður mun gera það. 

Hin myndin sýnir meðalvindhraða allra mánaða frá og með janúar 1995. Grái ferillinn fylgir mönnuðu stöðvunum en sá rauði sjálfvirkum byggðarstöðvum. 

Árstíðasveiflan sést sérlega vel - vindhraði er mun meiri að vetri heldur en að sumarlagi. Veturinn í vetur - og þá sérstaklega febrúarmánuður - sker sig nokkuð úr ásamt sömu mánuðum í fyrra. Við þurfum að fara allt aftur til 1995 til að finna eitthvað ámóta - og alveg aftur til 1989 varðandi febrúar eins og áður hefur komið fram. 

Það má líka benda á að júnímánuður í fyrra er hægastur allra mánaða á tímabilinu á sjálfvirku stöðvunum - á þeim mönnuðu gerir ágúst 2003 aðeins betur - er sjónarmun hægari. Þessi nástaða hæstu og lægstu gilda - á báðum tegundum stöðva - gæti sagt okkur að rétt sé að trúa á réttmæti febrúarhámarksins 2015. 

Ritstjórinn hefur líka reiknað meðalvindhraða á hálendisstöðvum og á stöðvum Vegagerðarinnar og fengið ámóta niðurstöður. Á vegagerðarstöðvunum var reyndar sjónarmun hvassara í desember til febrúar 2013 til 2014 heldur en í sömu mánuðum nú í vetur - en varla er sá munur marktækur. 

Sé litið á mönnuðu stöðvarnar allt aftur til 1949 var meðalvindur þeirra í febrúar 2015 sá næstmesti á tímabilinu sé aðeins litið til febrúarmánaða. Hann er hins vegar í sjöunda sæti allra mánaða tímabilsins. Á toppnum er desember 1992.