Aðeins meira af sólarleysismetingi

Sumarið sem nú má heita liðið var heldur sólarlítið um suðvestanvert landið. Um það hefur verið fjallað áður á þessum vettvangi. Þó var spurt hvernig málið yrði ef maí og september væru teknir með.

Hér að neðan er mynd sem sýnir uppsafnaðan sólskinsstundafjölda fjögurra sumra í Reykjavík frá 1. maí og út september. Árið í ár á eftir að bæta fáeinum stundum við til mánaðamóta - en ekki svo mörgum að það raski myndinni. Halli ferlanna gefur til kynna hvort sólríkt var eða ekki, sé hann lítill var sólarlítið, sé ferill brattur hefur verið sólríkt á þeim tíma.

Lóðrétti ásinn sýnir sólskinsstundafjöldann, sá lárétti dagafjölda frá og með 1. maí. Lituðu ferlarnir sýna síðan uppsafnaða stöðu frá degi til dags sumarið út. Hér eru tekin fjögur ár, 1955 (fyrir illt orð sem af því fer), árið í ár (2013) og árin 1983 og 2012 sem annars vegar sýna sólarrýrasta tímabilið og hins vegar það sólríkasta.

Eftir fyrsta mánuðinn er 1983 strax aumast, árið í ár fer aðeins betur af stað, en vart má milli sjá hvort árið 1955 eða 2012 gerir betur. Skemmst er frá því að segja að árið 1983 stendur sig jafnilla allt tímabilið í gegn - helst að athygli veki nær algjörlega sólarlaust (flatt) tímabil frá 2. til 14. ágúst. Þá mældust sólskinsstundirnar aðeins 5 í Reykjavík.

Árið 2012 (grænt) heldur sínu striki út í gegn, það er aðeins vika snemma í ágúst sem hefði getað gert betur. Minnkandi halli á línunni undir lokin sýnir fyrst og fremst styttri sólargang.

Sumarið 1955 sló aðeins af í júní en snemma í júlí keyrði um þverbak. Síðari hluti tímabilsins var jafnvel enn rýrari heldur en sami tími 1983.

Sumarið í ár, 2013, er öðru vísi heldur en 1955 og 1983 að því leyti að býsna brattar brekkur (sólrík tímabil) koma tvisvar eða þrisvar, mest munar um hálfan mánuð kringum mánaðamótin júlí/ágúst. Þá fór 2013 fram úr 1955 og hékk síðan ofan við það sem eftir lifði.

Skrár tengdar þessari bloggfærslu:

• sé byrjað fyrsta júní

Athugasemdir

[Torfi Stefánsson (IP-tala skráð) 26.9.2013 kl. 13:35]

Já, það er hægt að ljúga miklu með línuritum.

Dáldið fyndið t.d. að taka maí með - en nauðsynlegt til að ná næst bestu útkomunni fyrir árið í ár (og svo auðvitað að velja tvö verstu árin að auki).

Annað hefði reyndar verið uppá teningnum ef hitinn væri reiknaður á sama tímabili (vorið (apríl og maí) var kalt, meðalhiti í Reykjavík hefur ekki orðið lægri síðan 1989).

Enn eru menn í nauðvörn hvað síðastliðið sumar varðar. Ekki svo slæmt segir línurit Trausta.

Allar opinberar tölur segja hins vegar að sumarið hafi verið mjög slæmt, svo sem að meðalhiti þess (júní-ágúst) sé 1,2 stigum undir meðaltali síðustu 10 ára.

Og ekki bætir september úr skák ...

[Hilmar Hafsteinsson (IP-tala skráð) 26.9.2013 kl. 17:27]

Við skulum ekki vera ósanngjarnir Torfi. Spámenn Veðurstofu Íslands hafa lofað landsmönnum allt að +6°C aukningu ársmeðalhita á þessari öld: (http://www.umhverfisraduneyti.is/media/PDF_skrar/visindanefndloftslagsbreytingar.pdf).

Það er því alveg sjálfsagt að taka nettan Dr. James Hansen á vísindin ef fjandans náttúran neitar að fara eftir flottu spálíkönunum og sviðsmyndunum . . . ;)

[Trausti Jónsson, 27.9.2013 kl. 00:52]

Torfi. Spurning barst um það hvernig sumarsólin liti út ef maí og september væru teknir með - það var allt og sumt. Maí var ekki „nauðsynlegur“ gagnvart sólarsamanburðinum, sé byrjað í júní kemur nánast það sama út. Kíktu á viðhengi pistilsins. Um daginn var sagt hér á þessum vettvangi að síðastliðið sumar hefði verið það lakasta í Reykjavík síðan 1984 - að fimmtungamati hungurdiska - en það munu vera ýkjur - verri sumur hafa komið síðan. Hilmar - nú birtist ágrip af nýrri sérfræðiskýrslu IPCC á morgun - föstudag og fyrsti hluti aðalskýrslunnar kemur út á mánudaginn. Þá er bara að grafa sig í hana og leita að villum og rangfærslum. Ég veit ekki hvort eða hvenær Veðurstofan gefur út álit fyrir Ísland byggt á þessari nýju skýrslu. Almenn frétt mun þó birtast á vef Veðurstofunnar.

[Torfi Kristján Stefánsson, 27.9.2013 kl. 08:02]

Trausti. Hér er nýjasta umfjöllunin um hið reykvíska "sumar": "Sé litið á sérstakan vinsældakvarða sem m.a. mælir úrkomu og fjölda sólarstunda þá fær sumarið í ár falleinkunn, aðeins níu stig af 48 mögulegum í höfuðborginni. Það stendur langt að baki góðviðrissumrum síðustu ára. 2009 fær hæsta einkunn í samkeppninni um besta sumarið, alls 41 stig, sumrin 2010 og 2012 eru skammt undan með 39 stig og sumarið 2011 fékk 38 stig. Maí og september bættu litlu við gæði sumarsins..."

[Hilmar Hafsteinsson (IP-tala skráð) 27.9.2013 kl. 13:24]

Sæll Trausti. Ég dreg það ekki í efa að spámenn Veðurstofu Íslands munu leggja sig fram um að grafa sig í nýútkomið Evangelum IPCC til að leita að villum og rangfærslum :)

Svo er það auðvitað spurning um hvenær hin hámenntaða íslenska vísindanefnd um loftslagsbreytingar þiggur næst laun íslenskra skattborgara fyrir að þýða innihald skýrslu IPCC og samsama áliti sínu á væntanlegri kólnun á landinu bláa.

Erum við ekki að tala um a.m.k. -1°C kólnun á Íslandi fram til 2050? Eigum við bara ekki að setja fram hógværa spá og sleppa öllum öfgum? Það er jú ljóst að Veðurfræðin í dag býður ekki upp á neina nákvæmni í veðurspám sem toppa tíu daga fram í tímann - ekki satt Trausti?