Af septemberástandinu

Nú eru liðnir 9 dagar af september 2010 og óhætt að líta til beggja átta. Metahrinan á dögunum stóð í 5 daga, met voru sett á 73 sjálfvirkum stöðvum (vegagerðarstöðvar taldar með). Síðasta metahrina í september var árið 2002 þannig að hálfgert ómark er að telja með stöðvar sem byrjuðu eftir það. En 26 eldri sjálfvirkar stöðvar slógu sín gömlu met.

Flest metin voru slegin þann 4. en met féllu einhvers staðar alla dagana 1. til 5. september. Flest merkari metin eru vel tíunduð á bloggi Sigurðar Þórs Guðjónssonar þannig að ég sleppi því hér.

Tíu mannaðar stöðvar slógu met. Merkast var fall Akureyrarmetsins frá 1939 og 1941 (22,0 stig) - nýja metið var 23,6 stig og 24,0 mældust á sjálfvirku stöðinni við Krossanesbrautina.

Í vissum skilningi heldur metið á Akureyri frá 19. september 1941 sér, nú sem hæsti hiti á Akureyri svo seint á sumri (já, já, það er líka met).

Lauslega að stöðunni í Reykjavík. - Meðalhitinn það sem af er er 13,9 stig. Það er talsvert fyrir ofan það sem hæst hefur verið sömu daga síðustu 60 árin rúm, en nánast það sama og í september 1939. Það ár er ásamt 1941 aðalkeppinauturinn um nýtt meðalhitamet í september. Síðara árið tók gríðarlegan sprett eftir miðjan mánuð (samanber 22 stigin á Akureyri) og verður erfitt við að eiga þó að fyrstu 10 dagarnir þá hafi verið nærri 2 stigum kaldari en sömu dagar nú.

En hvernig eru svo framtíðarhorfurnar? Um þær má segja að þær séu einkennilegar.

Sem stendur er nefnilega spáð norðanáhlaupi fyrri hluta næstu viku. Þar sem nú nálgast miður september mætti helst reikna með slydduhreti og frostmarkskulda af þeirri átt. Svo bregður hins vegar við að hitinn í „hretinu“ minnir frekar á júlíkast heldur en eitthvað sem kemur þegar dregur að jafndægrum. En séu spár teknar bókstaflega fer hiti niður í meðallag hér í Reykjavík um miðja vikuna. Þó norðanáttin sé hlý slær hún samt mjög á möguleika mánaðarins í metaslagnum. En enn lengri spár gera aftur ráð fyrir hita yfir meðallagi - hvað svosem er að marka þær.

 

Athugasemdir

[Emil Hannes Valgeirsson, 10.9.2010 kl. 23:08]

Samkvæmt skrá sem ég nálgaðist á vef Veðurstofunnar á sínum tíma eru september 1939 og 1958 skráðir jafnir með 11,4 stig og 1941 með 11,1 stig.

1939 og 1941 hitatölurnar virðast hafa verið lækkaðar frá upphaflegum tölum en ekki 1958. Sjálfsagt er erfitt að eiga við þetta vegna flutninga Veðurstofunnar innan borgarinnar.

[Trausti Jónsson, 11.9.2010 kl. 01:28]

Já, það er rétt hjá þér Emil, reynt er að taka tillit til flutninga innan borgarinnar með þessum reiknikúnstum. Rökstuðningurinn er ekkert sérlega sterkur, en felst þó í samanburði við aðrar stöðvar, samanburðarmælingum á flugvelli og við Veðurstofuhúsið auk þess sem dægursveifla hitans á þessum stöðum kemur við sögu. Mér þykir ekki ótrúlegt að reynt verði að nálgast leiðréttinguna betur í framtíðinni. Lengi hefur staðið til að setja sjálfvirkan hitamæli á þak Oddfellowhússins í kvosinni. Þar eru fleiri mælitæki tengd flugvellinum. Af þessu hefur þó ekki orðið vegna þess sem teljast brýnni verkefni. En sannleikurinn er auðvitað sá að manni finnst dálítið svindlað á metum þegar þau eru borin saman við leiðréttar tölur, samviskubitið er fyrir hendi nema meðalhiti fari upp fyrir gömlu, óhnikuðu tölurnar.