Eitt versta veður síðari ára

Nú er hægt að slá á samanburð illviðrisins í dag og annarra veðra síðari ára. Annar vegar teljum við á hversu mörgum sjálfvirkum stöðvum í byggð - af öllum - vindur náði 20 m/s á athugunartíma og reiknum hlutfall. Það berum við saman við hlutfall annarra daga. 

Þá fæst eftirfarandi tafla:

röð	ár	mán	dagur	vísitala
1	2001	11	10	746
2	1999	1	16	723
3	2008	2	8	705
4	2008	1	27	676
5	2015	3	14	675
6	2007	12	30	660
7	2014	11	30	594
8	2001	12	7	562

Taflan nær frá janúar 1996 til dagsins í dag. Veðrið í dag er í 5. sæti - á sennilega eftir að hækka aðeins - dagurinn er ekki liðinn (gert kl. 16:30). Munur á þessum veðrum er varla marktækur - en veðrið í dag er alla vega ekki verra en þau verstu.

Við getum líka reiknað meðalvindraða sólarhringsins á sjálfvirkum stöðvum í byggð og búið til þessa töflu:

röð	ár	mán	dagur	mvindur
1	1999	1	16	16,44
2	2012	11	2	15,46
3	1996	2	21	15,41
4	2015	3	14	15,28
5	1996	11	14	15,22
6	2001	11	10	14,94
7	2007	11	30	14,50
8	2011	3	14	14,29

Aftasti dálkurinn sýnir meðalvindhraða í m/s. Veður dagsins er hér í 4. sæti - en á væntanlega eftir að hrapa nokkuð þar til deginum lýkur (hægasti hluti sólarhringsins) er eftir. En samt - þetta er vel af sér vikið. 

Vekja má athygli á því að 30. nóvember 2007 er á öðrum listanum, en 30. desember sama ár á hinum - þetta er rétt. Þessir tveir dagar komast á sitt hvorn listann.

Fyrri listinn mælir helst snerpu veðra - en sá síðari afl og úthald. Við reynum að bera saman árangur í sprett- og langhlaupum. Sumir dagar fá verðlaun í báðum flokkum - en aðrir láta sér annan nægja. 

Breyting í lok dags:

Eins og líklegt var talið hér að ofan hækkaði dagurinn lítillega í snerpunni (efri taflan) - vísitalan endaði í 688 og þar með í fjórða sæti (en ómarktækt lægri en þrjú efstu sætin).

Hins vegar hrapaði dagurinn talsvert í úthaldskeppninni - eins og búast mátti við - meðalvindhraði í byggð endaði í 13,11 m/s og hrap niður í 24. til 25. sæti er staðreynd. 

Athugasemdir

[Halldór Friðgeirsson (IP-tala skráð) 14.3.2015 kl. 20:50]

Það er athyglisvert að mars er að tryggja sig í sessi sem einn af verstu illviðra mánuðum ársins ásamt nóv., des., jan. og feb.

[Sindri Karl Sigurðsson, 14.3.2015 kl. 23:49]

Þegar talað er um mars, sem mánuð sakleysis og nú skyndilega sem mánuður ýfinga í veðri vil ég benda á þetta: [url]http://timarit.is/view_page_init.jsp?issId=125433&pageId=1782092&lang=is&q[Url]. Mér finnst líklegt að Trausti muni vel eftir þessu veðri, var sjálfur á sjó þegar þetta átti sér stað og það var mikil umræða manna á meðal í skipaflotanum eftir þetta veður. Enda spáin 4-6 vindstig þar sem við vorum að veiðum en veðurhæðin yfir 12 þegar veðurfréttirnar voru lesnar.

Það var fróðlegt að lesa pistilinn um vestanveðrið í síðustu viku og hvernig það getur komið mönnum algerlega í opna skjöldu. Eftir þann lestur finnst mér líklegt að eitthvað slíkt hafi í raun gerst þennan örlagadag árið 1993. Kannski leynist eitthvað í handraðanum hjá Veðurstofunni, sem hægt væri að bera saman við þá og nú?

ps. ég hef ekki hugmynd um hvort tengillinn virkar en timarit.is og leita að óveðri þann 8. mars 1993, ætti að koma þessu til skila.

[Trausti Jónsson, 15.3.2015 kl. 00:58]

Mars hefur alltaf verið einn helsti illviðramánuður ársins og sérlega mannskæður í gegnum tíðina - Menn hafa alltaf sótt sjó mjög stíft í þessum mánuði og slysaslóðinn endalaus -. Þar á meðal er veðrið 1993 - sem ég man vel. Þar var sérkennilegur éljagarður á ferðinni sem þáverandi reiknilíkön náðu ekki - og engar upplýsingar voru um þar til hann skall á. Nú er unnið að endurgreiningu veðurs við Ísland í nokkrum smáatriðum aftur til 1979. Forvitnilegt verður að sjá hvort garðurinn 8. mars 1993 kemur þar fram - það er þó alls ekki víst.

[Hrólfur Þ Hraundal, 15.3.2015 kl. 11:40]

Ég man eftir því þá ég var á Nesi við Norðfjörð að gamlir menn sögðu á góðviðrisdegi í febrúar að rétt væri að muna að Langimars væri nú eftir.