Vorströggl

Vorinu hefur nokkuð miðað undanfarna daga og líkur til að næsta norðankast verði nokkru hlýrra heldur en þau sem á undan hafa gengið. - Hvað sem svo verður.

w-blogg100513a

Kortið gildir um hádegi á sunnudag. Jafnhæðarlínur 500 hPa-flatarins eru heildregnar en litir sýna þykktina. Hún segir frá hita í neðri hluta veðrahvolfs. Mörkin á milli bláu og grænu litanna er við 5280 metra. Skipt er um lit á 60 metra bili. Allt blátt við Ísland er undir meðalhita þannig að sunnudagurinn verður ekki hlýr. En kalda loftið er að þessu sinni komið úr suðri - bítur varla.

Þegar háloftalægðin fyrir suðvestan land fer til austurs snýst vindur til norðausturs og norðurs eins og vera ber. Kalda loftið hringast loks um lægðina. Efnið í norðanáttinni verður þá að minnsta kosti til að byrja með komið sunnan fyrir lægðina, austur fyrir og loks til suðurs fyrir vestan hana. Von er til þess að bylgjan mikla yfir Ameríku loki fyrir loft sem annars kæmi til suðurs fyrir austan Grænland.

Það er nokkur kraftur í kuldapollinum mikla og má ef vel er að gáð sjá fjólubláan blett í honum miðjum. Þar er þykktin minni en 4920 metrar. Pollur þessi ógnar okkur ekki svo langt sem sést.

Lægðardragið í ameríkubylgjunni er öflugt og við sjáum að blái liturinn nær alveg suður um vötnin miklu. Vel má vera að það snjói og frjósi á þeim slóðum á sunnudag-mánudag. Miklar hitasveiflur eru þessa dagana vestra og hiti nærri metum sums staðar í norðvesturríkjunum á föstudag/laugardag.

Svo virðist sem hækkandi sól sé að takast að valda umskiptum í austanverðri Evrópu. Það er vorboði um norðanverða álfuna þegar loft úr austri hættir að vera kalt og verður þess í stað hlýtt.

Spár meir en 5 til 7 daga fram í tímann eru langoftast vitlausar á einhvern hátt. Þær breytast gjarnan hratt og mikið frá einu spárennsli til annars. Spá um öfgar langt fram í tímann eru nærri því alltaf rangar. En það er samt ekki leiðinlegt að fylgjast með þeim - og svo kemur fyrir að þær rætast.

Rennsli reiknimiðstöðvarinnar miðvikudaginn 8. maí kl. 12 lét hlýja loftið úr austri ná alveg til Íslands. Rennslið í dag, fimmtudaginn 9. maí kl. 12 sýndi allt annað ástand. Við sjáum þykktarspárnar á kortinu hér að neðan. Þær eiga við sama tíma í framtíðinni. Í fyrra rennslinu er þykktin yfir Íslandi meiri en 5480 metrar. Það dugir í hátt í 20 stiga hámarkshita á landinu. Síðara rennslið sýnir ekki nema 5280 metra þykkt. Dugir varla í 10 stiga landshámarkshita. Heldur leiðinlegt þegar búið er að veifa hlýindum framan í mann.

w-blogg100513b

En kalda rennslið (kalt hjá okkur) er hlýtt annars staðar því það segir að 5640 metra línan komist vestur á Mæri í Noregi við enda spátímabilsins. Það dugir í hátt í 27 til 30 stig ef heppni er með. Það væri nærri hlýindameti í Suður-Noregi í maí. Öfgar í enda spátímans - eru nærri því alltaf rangar. Skemmtiefni samt.


« Síðasta færsla | Næsta færsla »

Athugasemdir

1 identicon

Takk fyrir þetta, Trausti. Já, lagtímaspárnar hafa verið nokkuð á reiki og greinilegt að menn eru ekki búnir að ná það langt að geta sagt fyrir um veður í smáatriðum langt fram í tímann. Hinsvegar hefur kuldatíð að undanförnu beint huganum að því hvort verið geti að hafstraumar séu að veikjast hér á norðanverðu Atlantshafi og það valdi kaldari vorum en lengi vel hafa verið fyrirfarandi ár. Vel að merkja slær það í takt við reiknilíkön, sem menn notuðu þegar verið var að spá fyrir um langtímaáhrif hinar margumræddu hlýnunar jarðar.

Þorkell Guðbrandsson (IP-tala skráð) 10.5.2013 kl. 08:19

2 identicon

Vorströgglið hjá Veðurstofu Íslands lætur ekki að sér hæða. Sanntrúaðir íslenskir óðahlýnunarspámenn eiga erfitt með að halda andlitinu þegar náttúran rassskellir þá opinberlega:(http://www.visir.is/erfitt-ad-meta-umfang-vandans-/article/2013130519926)

"Atvinnu- og nýsköpunarráðuneytið telur að eins og sakir standa sé erfitt að meta nákvæmlega umfang vandans þar sem að það ræðst meðal annars af veðurfari næstu vikna. Það þykir því rétt að búa sig undir það versta en vona um leið hið besta." (Tilvitnunin er niðurlang glænýrrar fréttar á íslenska fréttavefnum visir.is (10. maí 2013) um erfiðleika bænda á Norður- og Austurlandi vegna mikilla snjóþyngsla).

Vituð ér enn eða hvað? :)

Hilmar Hafsteinsson (IP-tala skráð) 10.5.2013 kl. 18:27

3 Smámynd: Trausti Jónsson

Þorkell. Ekki er vitað til þess að meginhafstraumar hafi breyst á norðanverðu Atlantshafi á síðari árum en sjávarhiti hefur nú í um 15 ár verið mjög hár á okkar slóðum og ekki er lát þar á að ég veit. En norðan- og austanáttir hafa verið óvenjutíðar hér á landi síðustu árin - ekki síst í maí og júnímánuði. Hilmar, já til allrar hamingju er ekki síhlýnandi. Sífellt má endurtaka þær hamingulýsingar.

Trausti Jónsson, 12.5.2013 kl. 01:38

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Nýjustu myndir

  • w-blogg200324b
  • w-blogg200324a
  • Slide10
  • Slide9
  • Slide8

Heimsóknir

Flettingar

  • Í dag (28.3.): 37
  • Sl. sólarhring: 53
  • Sl. viku: 528
  • Frá upphafi: 2343290

Annað

  • Innlit í dag: 34
  • Innlit sl. viku: 480
  • Gestir í dag: 30
  • IP-tölur í dag: 28

Uppfært á 3 mín. fresti.
Skýringar

Eldri færslur

Innskráning

Ath. Vinsamlegast kveikið á Javascript til að hefja innskráningu.

Hafðu samband