Hæðarhryggurinn lifir

Þegar heimskautaröstin fer á annað borð að skjóta upp miklum kryppum (hryggjum) vilja þær gjarnan verða viðvarandi á einhvern hátt. Brotna e.t.v. niður í nokkra daga, en skjótast svo upp aftur á svipuðum slóðum og áður.

Stundum ná hryggirnir það langt norður að þeir (með sínum hlýja kjarna) slitna alveg frá röstinni, mynda háloftahæðir sem reika dögum saman um norðurslóðir - þar sem venjulega eru heimkynni stóru kuldapollanna. Geislunarbúskapur er þeim þó ekki hagstæður (öfugt við kuldapollana) og smám saman kólna þeir og falla saman. 

Hryggurinn sem olli norðanáttinni í liðinni viku fór óvenjulangt norður - stuggaði þar við vestari kuldapollinum mikla - þeim sem ritstjóri hungurdiska hefur kosið að kalla Stóra-Bola. Ekki hefur Boli enn jafnað sig að fullu. 

Nýr hryggur er nú að ryðjast norður á bóginn - líklega aðeins austar en sá fyrri. Fari svo lendir Ísland vestan við mestu norðanáttina - og jafnvel um tíma í sunnanátt í vesturjaðri hryggjarins.

Hér má sjá norðurhvelskort evrópureiknimiðstöðvarinnar sem gildir kl. 18 síðdegis á miðvikudag. Jafnhæðarlinur eru heildregnar, en þykkt er sýnd með lit. Þykktin mælir hita í neðri hluta veðrahvolfs, því meiri sem hún er því hlýrra er loftið. 

Jú, kuldapollurinn Stóri-Boli er á sínum stað, en ekki sérlega kaldur - óttalega laslegur miðað við venjulegt heilsufar - afkomandi hans sem sjá má við Svalbarða er öflugri. Öflugastur þó er bróðir þeirra í kuldanum, Síberíu-Blesi, ekki þó í raun sérlega öflugur miðað við það sem oft er. Á milli þeirra er hlý hæð - ekki langt frá norðurskauti, leifar síðasta hryggjar. 

Ísland er hér þakið grænum litum, sem teljast mildir á þessum tíma árs. Guli sumarliturinn virðist jafnvel vera að sækja til landsins úr suðvestri. - En nú er snjór um mestallt land og vindur hægur þannig að kalda loftið er ekki alveg búið að yfirgefa landið þegar hér er komið sögu. 

Undir vikulokin verður mjög sótt að hæðarhryggnum úr vestri og tilraun gerð til að berja hann niður. Hvort einhverjar verulegar sviptingar verða í veðri hér í þeim átökum skal ósagt látið að sinni. 

Svo gera spár helst ráð fyrir því að hæðarhryggurinn rísi upp í þriðja sinn - ætlar ekkert að gefa sig. Hæðarhryggir sem vilja sitja nærri Suður-Grænlandi eru alltaf óþægilegir fyrir okkur - stutt er á milli gæðaveðurs annars vegar - og einhvers vestan- eða norðanofsa hins vegar. Gæðaveðrið algengara þó - ýmist er það kalt eða hlýtt - skiptir kannski ekki öllu, en illviðrin mjög skæð komi þau á annað borð. 

Svo er enn verið að spá nóvemberkuldameti í heiðhvolfinu yfir landinu. Frost er þar nú í kringum -80 stig í 22 km hæð. Þetta er nægilegur kuldi til að halda glitskýjasýningu - þá rétt fyrir sólarupprás og eftir sólarlag - byrgi neðri ský ekki sýn. En kuldinn einn og sér dugar þó ekki heldur þurfa vindaðstæður einnig að vera hagstæðar - rétt samt að fylgjast með.