Þó okkur komi það lítið við

Ritstjóri hungurdiska hefur oft fjallað um svona lægðir áður - veit þó ekki alveg hvað hann á að kalla þær þó auðþekktar séu. 

Móðurlægðina sjáum við langt suðvestur í hafi - hægfara og lokaða inni af hæðarhrygg sem lagst hefur yfir úr vestri. Sunnanáttin austan við er nokkuð öflug og gefur hlýtt og rakt loft norður í háloftaröstina sem ber hlýindin og rakann hratt til austurs. Á sama tíma ber að kalt loft beint úr norðri. Kortið gildir kl. 6 í fyrramálið, miðvikudag 4. október og hefur smálægð náð að myndast þar sem hlýja loftið nær lengst til norðurs. 

Háloftakortið sýnir stöðuna kl.18. Hér má vel sjá hvernig hlýja loftið myndar bylgju sem þrengir sér til móts við kuldann að norðan. Þó þetta sé ekki stór lægð er hún samt ákaflega varasöm og gæti valdið vonskuveðri, fyrst á heiðum og fjöllum Norður-Englands, og svo í Hollandi og Þýskalandi aðfaranótt fimmtudags og á fimmtudaginn. - Ekki er það þó fullvíst og kemur okkur varla við.

En lægðir þessarar ættar hafa mjög oft valdið mjög vondum veðrum hér á landi og leggjast illa í gamla veðurspámenn sem þykjast muna tímana tvenna í spáreikningum. Vonandi að tölvuspár nútímans hafi loks náð tökum á þeim flestum þannig að þær þurfi lítt að koma á óvart. 

En kalda loftið sem á þessu korti er yfir Íslandi er ekki svo óskaplega kalt, en þó rétt undir meðallagi árstímans. Síðan hlýnar aftur fyrir helgi - hvað sem það svo endist. Því haustið nálgast. 

Athugasemdir

[Halldór Egill Guðnason, 4.10.2017 kl. 03:23]

Getur verið að, það sem þú lýsir svo vel, geti endað með einhverskonar "clash of the clans" þegar áfram gengur haustið? Þetta er ekkert smápúður, sunnanvert og norðan.

 Góðar stundir, með kveðju að sunnan.

[Torfi Stefánsson (IP-tala skráð) 4.10.2017 kl. 09:30]

Haustið nálgast? Þú meinar auðvitað veturinn því haustið er löngu komið.

[Helga Kristjánsdóttir, 4.10.2017 kl. 12:40]

Á tímatali Torfi,en íslenskt lifandi mál leyfir okkur að undirstrika okkar hughrif; T.D. "nú er sumarið loksins komið",þegar við fáum fyrsta heila sólardaginn í byrjun júlí. Eða nú eru jólin komin þegar fyrsti snjórinn fellur snemma í desember.