Með öflugra móti

Hæðarhryggur fyrir vestan land færist nú í aukana og verður óvenjuöflugur í nokkra daga. Evrópureiknimiðstöðin segir að á mánudagskvöld (11. apríl) verði staðan sú sem myndin sýnir.

Heildregnu línurnar sýna hæð 500 hPa-flatarins, en litir þykktina. Þykktin mælir hita í neðri hluta veðrahvolfs. Mörkin milli grænu og gulu litanna er við 5460 metra - meiri þykkt en það telst sumarhiti. - En uppheimahiti sem þessi nýtist illa við jörð - hér fyrst og fremst vegna vindáttarinnar (að norðan) sem og þess að yfirborð landsins er enn kalt - snjór víða að bráðna til heiða og fjalla - auk þess sem sjávarhiti er auðvitað nærri vetrarstöðu líka. En aldrei samt að vita nema að einhvers staðar á landinu verði hlýtt. 

Svona staða er oft harla óþægileg - þegar mikil hlýindi skjóta sér langt norður fyrir venjulega stöðu eru kuldar oft á ferð sunnar en vant er - þeir eru það svosem í þessu tilviki eins og sjá má á kortinu hér að neðan.

Litirnir sýna þykktarvik næstu tíu daga í reikningum evrópureiknimiðstöðvarinnar. 

Hlýindin yfir Grænlandi (í hæðarhryggnum) sýna hita um 190 metra yfir meðallagi (9,5 stig) - en vestur af Bretlandi er óvenjukalt - hiti rúmlega -100 metra undir meðallaginu (-5,0 stig) - það er mikið í 10 daga yfir varmagefandi hafi. 

En okkur finnst þetta svosem í lagi - miðað við vindátt - hér er hita spáð nærri meðallagi í mannheimum - ríflega vestan- og suðvestanlands - en tæplega í meðallagi eystra. - En ritstjóra hungurdiska er þó sjaldnast rótt undir mjög stórum háþrýstisvæðum að vorlagi - sama þótt reiknimiðstöðvar syngi þýðum rómi. - Hófsamir söngvar eru hollari. 

Athugasemdir

[Torfi Stefánsson (IP-tala skráð) 9.4.2016 kl. 17:42]

Trausti! Hver er meðalhitinn það sem af er mánuðinum, núna þegar næstum þriðjungur er búinn af honum og landið að fara inn í norðanáttir og kaldari nætur en hafa verið það sem af er mánuðinum?

[Trausti Jónsson, 10.4.2016 kl. 01:03]

Meðalhiti í Reykjavík fyrstu 9 daga aprílmánaðar er 4,9 stig. Það er 3,2 stigum ofan meðallags 1961 til 1990, og 1,7 ofan meðallags síðustu tíu ára, í 11 sæti sömu daga á 68-ára hitalistanum. Á Akureyri er meðalhitinn þessa sömu daga 2,8 stig, 2,4 og 1,2 stig ofan meðaltalanna og í 17. sæti á 68-ára listanu.