Sjávarhitavik ágústmánaðar

Sjór er enn kaldur suður í hafi - en fremur hlýtt er norðurundan. Kortið sýnir vik frá meðallagi áranna 1981 til 2010 - eins og evrópureiknimiðstöðin reiknar.

Heildregnu línurnar sýna meðalsjávarmálsþrýsting. Þar er austanáttin áberandi, norðan lægðarmiðju skammt sunnan við land. Litir sýna hitavikin - þau bláu eru neikvæð en þau jákvæðu eru gul og brún.

Enn er kalt suður í hafi - miðað við árstíma. Trúlega heldur þetta ástand áfram. Enn er hlýtt í norðurhöfum enda er hafís með minnsta móti - í langtímasamhengi. 

En kortið sýnir aðeins ástandið í yfirborðslögum - haustkólnun og vaxandi vindur eykur blöndun á næstu vikum og þá fáum við að sjá hvort eitthvað leynist rétt undir yfirborði.