Hlýr alþjóðavetur hér á landi

Alþjóðaveðurfræðistofnunin skiptir árinu í fjórar jafnlangar árstíðir, vetur, vor, sumar og haust. Hver þeirra er þrír mánuðir að lengd, veturinn er desember, janúar og febrúar. Hér á landi telst mars einnig til vetrarmánaða - enda er hann oft kaldasti mánuður ársins. En nú (fimmtudagskvöld 27. febrúar) er alþjóðaveturinn 2013 til 2014 liðinn. Við skulum því líta á hitameðaltöl hans í Reykjavík og á Akureyri.

Meðalhiti í Reykjavík var 1,2 stig, 1,4 stigum ofan meðallags 1961 til 1990 og nákvæmlega í meðallagi sé miðað við síðustu 10 ár. Þetta nægir í 19. sæti af 148.

Á Akureyri er meðalhitinn nú -0,2 stig, 1,6 stigum ofan meðallagsins 1961 til 1990, en 0,4 undir meðallagi síðustu tíu ára. Á Akureyri lendir alþjóðaveturinn í 23. hlýindasæti af 132 samfelldra mælinga.

Enn er því ekkert lát á hlýjum alþjóðavetrum hér á landi. Svo er spurningin hvernig mars gerir það.

Rétt er að taka fram að tölurnar hér að ofan eru fengnar með snöggu kasti inn í töflureikni og á munnþurrku - en vonandi nokkurn veginn réttar - ef ekki kemur það í ljós. - Svo er einn dagur eftir af febrúar og hnikast þá stundum á milli í fyrsta aukastaf.

Athugasemdir

[Torfi Stefánsson (IP-tala skráð) 28.2.2014 kl. 11:06]

Það hefði kannski einhver búist að Trausti myndi setja inn aðrar tölur en hitatölur þennan síðasta dag mánaðarins, svo sem þurrkatölurnar sem slá nær öll met sem hægt er að slá.

Ó nei! Það er mikilvægara fyrir hann að sýna fram á að við séum enn inni í hlýindaskeiði því sem byrjaði um og uppúr 1995 (þ.e.a.s hvað þessa þrjá vetrarmánuði varðar).

Öðrum þætti kannski athyglisverð fréttin sem birtist um að svifryksmengun í Reykjavík 19. febrúar síðastliðinn hafi verið fjórum sinnum meiri en mengunin í Peking þann daginn. Peking er jú alræmd mengunarborg. Og þá væri kannski ráð að spyrja veðurfræðinginn: "Hvernig ætli standi á þessu"?

Hér er þráður á graf sem sýnir hina ótrúlegu mengun þennan dag hér í höfuðborginni. Hér þar að breyta stillingum aðeins, setja svifryk í stað brennisteins og færa dagsetninguna aftur. Mengunin þenna dag hefur verið alveg ótrúleg miðað við dagana í kring:

http://www.ust.is/einstaklingar/loftgaedi/maelingar/

[Emil Hannes Valgeirsson, 28.2.2014 kl. 12:36]

"Ó nei!" hvað Torfi? Má ekki fjalla um hitatölur þegar hlýtt er eða á bara að nefna þær þegar kalt er?

Ég veit ekki hvað Trausta þykir mikilvægt að sýna fram á, en eins og er, er engin ástæða til segja að hlýindaskeiðinu sem ríkt hefur eftir 1995 sé lokið. Þar að auki þarf nokkurra ára fjarlægð í tíma til að segja til um slíkt.

[Hilmar Hafsteinsson (IP-tala skráð) 28.2.2014 kl. 13:41]

Bestu þakkir fyrir áhugaverða samantekt Trausti:

1. "Meðalhiti í Reykjavík > tímabilið des. &#39;13 - feb. ´14 < var 1,2 stig, 1,4 stigum ofan meðallags 1961 til 1990 og nákvæmlega í meðallagi sé miðað við síðustu 10 ár. Þetta nægir í 19. sæti af 148."(sic)

2. "Á Akureyri er meðalhitinn nú -0,2 stig > tímabilið des. &#39;13 - feb. ´14 <, 1,6 stigum ofan meðallagsins 1961 til 1990, en 0,4 undir meðallagi síðustu tíu ára. Á Akureyri lendir alþjóðaveturinn í 23. hlýindasæti af 132 samfelldra mælinga."(sic)

Nákvæmlega í meðallagi í Rek. og 0,4 undir meðallagi síðustu tíu ára á Ak. nægir enn sem komið er til að hægt er að fullyrða að "enn er því ekkert lát á hlýjum alþjóðavetrum hér á landi."(sic)

En hvað með spá hinnar íslensku vísindanefndar um loftslagsbreytingar um allt að 6°C hækkun ársmeðalhita á þessari öld Trausti? Það virðist vera lítil hlýnun í kortunum á Íslandi :)

[Sigurður Þór Guðjónsson, 28.2.2014 kl. 13:49]

Kæmi ekki á óvart að Trausti eigi eftir að gefa þurrkinum skil þegar frekari kurl koma til grafar. Samt er ljóst að þurrkamet  í febrúar hafa aðeins verið sett á stöku stað. Það er fjarri því að nær öll met sem hægt er að slá hafi verið slegin.  

[Pálmi Freyr Óskarsson, 28.2.2014 kl. 18:27]

 Það er búið að vera heitt í Noregi í vetur.

Torfi, þetta er einkablogg hjá Trausta og því ræður hann hvað hann setur inn enn ekki þú. Ég til dæmis mundi vilja sjá meira umfjöllun um loftþrýsting og vind, enn dett samt ekki í hug að krefjast um það hjá Trausta. Nema þá undir merkjum Veður.is.

Hilmar, snúum þessu kannski við. Reykjavík, 129 kuldasæti af 148. Og Akureyri, 109 af 132.

[Hilmar Hafsteinsson (IP-tala skráð) 28.2.2014 kl. 21:10]

Það má reyndar heita merkilegt hvað fréttir af veðri og færð á landinu á mbl.is í dag virðast stangast á við hlýja alþjóðaveturinn hans Trausta:

Innlent | mbl | 28.2.2014 | 14:21

"Spá snjókomu og skafrenningi

Ófært er á Mývatnsöræfum, Möðrudalsöræfum og Vopnafjarðarheiði og mokstri hætt. Hálkublettir eða snjóþekja er á Fljótsdalshéraði, snjóþekja og éljagangur er á Fjarðarheiði og hálka á Fagradal en snjóþekja og snjókoma er á Oddsskarði. Þungfært er á Vatnsskarði eystra en unnið að mokstri." (http://www.mbl.is/frettir/innlent/2014/02/28/spa_snjokomu_og_skafrenningi/)

Innlent | mbl | 28.2.2014 | 13:47 | Uppfært 14:06

"Hættuástand við háspennulínur

Mikið fannfergi er enn til fjalla víða á Austurlandi og Vestfjörðum og hættulega stutt upp í línuleiðara á mörgum stöðum, s.s. á Fjarðarheiði eystra og á norðanverðum Vestfjörðum." (http://www.mbl.is/frettir/innlent/2014/02/28/haettuastand_vid_haspennulinur/)

Innlent | mbl | 28.2.2014 | 10:57 | Uppfært 11:36

"Þungfært um Möðrudalsöræfi

Hálka og skafrenningur er Mývatnsöræfum en þungfært og skafrenningur er á Möðrudalsöræfum en þar er mjög slæmt skyggni." (http://www.mbl.is/frettir/innlent/2014/02/28/thungfaert_um_modrudalsoraefi_2/)

Innlent | mbl | 28.2.2014 | 9:07

"Möðrudalsöræfi ófær en mokað í dag

Ófært er á Mývatns- og Möðrudalsöræfum en þar stendur til að moka í dag." (http://www.mbl.is/frettir/innlent/2014/02/28/modrudalsoraefi_ofaer_en_mokad_i_dag/)

Innlent | mbl | 28.2.2014 | 7:52 | Uppfært 9:57

"Slæm færð og skyggni á Vestfjörðum

Á Vestfjörðum er snjóþekja og hálkublettir, allhvasst og mikill skafrenningur á fjallvegum. Ófært er á Gemlufallsheiði en mokstur stendur yfir. Ófært er á Steingrímsfjarðarheiði, á Þröskuldum og á Klettshálsi og verða aðstæður skoðaðar í birtingu." (http://www.mbl.is/frettir/innlent/2014/02/28/slaem_faerd_og_skyggni_a_vestfjordum/)

Innlent | mbl | 28.2.2014 | 7:14 | Uppfært 10:07

Öxnadalsheiði ófær

Á Norðurlandi eru vegir auðir vestan Blönduóss en þar fyrir austan er víðast hvar vetrarfærð, hálkublettir, hálka eða snjóþekja og víða ofankoma. ófært er á Öxnadalsheiði en mokstur stendur yfir. Vegurinn um Hólasand er ófær." (http://www.mbl.is/frettir/innlent/2014/02/28/xnadalsheidi_ofaer/)

Svo er líka búinn að vera svo hlýr alþjóðavetur í Kanada og Bandaríkjunum :)

[Torfi Kristján Stefánsson, 28.2.2014 kl. 21:49]

Sigurður Guðjónsson var fyrstur með fréttirnar af þurrkinum. Samkvæmt honum reyndist febrúar vera sá fjórði þurrasti sem mælst hefur í Reykjavík frá 1885. Úrkoman var 12,9 mm en var minnst 1966 4,9 mm, 9,0 mm í þeim ískalda febrúar 1885, og 10,0 mm árið 1900. Úrkomudagar voru núna fimm en frá stofnun Veðurstofunnar 1920 hafa þeir fæstir verið þrír í febrúar 1947, þeim sólríkasta sem mælst hefur og fimm í febrúar 1977. Árið 1966, í úrkomuminnsta febrúar, voru þeir hins vegar 7. Úrkomuminnsti febrúar sem mælst hefur á landinu í heild er talin vera árið 1900 en næstur kemur frá þeim tíma 1977, 1901 og 1966. Þess má geta að febrúar árið 2010 er talinn sá 11. þurrasti frá 1900 á landinu.

Þurrkamet einstakra stöðva sem alllengi hafa verið athuguð: Í Stafholtsey í Borgarfirði hefur alls engin úrkoma mælst (stöðin er um 25 ára). Í febrúar 1977 mældust 0,2 mm í Síðumúla í Hvítársíðu. Í Stykkishólmi er þetta næst þurrasti febrúar, alveg frá 1857 en minnst var árið 1977. Á Bergsstöðum í Skagafirði hefur ekki mælst minni febrúarúrkoma eða í nokkrum mánuði, 0,4 mm, frá 1979. Á Þingvöllum, þar sem er sjálfvirk úrkomustöð, hefur líklega ekki mælst minni úrkoma í febrúar. Kannski minnir þessi mánuður núna nokkuð á febrúar 1977. Þá var þrálát austanátt eins og nú og metþurrkar, í alveg bókstaflegum skilningi, á Vesturlandi og mjög þurrt var á norðvestanverðu landinu. En febrúarmánuður í ár er miklu mildari en 1977.

Þá er komið "örstutt" yfirlit frá Veðurstofunni vegna tíðarfarsins í febrúar:

Óvenjueindregin austan- og norðaustanátt var ríkjandi í mánuðinum. Sérlega þurrt var um landið vestanvert allt norður fyrir Breiðafjörð og sömuleiðis inn til landsins á Norðurlandi vestanverðu. Á þessu svæði var febrúar hinn þurrasti um áratugaskeið, í Reykjavík frá 1966 og frá 1977 í Stykkishólmi.

Hlýtt var í veðri og hiti vel yfir meðallagi áranna 1961 til 1990 en í meðallagi sé miðað við hin óvenjuhlýju ár síðasta áratuginn. Meðalhiti í Reykjavík var 1,7 stig, 1,4 yfir meðallagi fyrrnefndu áranna, en 0,2 yfir meðallagi síðustu tíu ára.