Enn ein stórlægðin (viðheldur svipuðu ástandi)

Svo virðist sem enn ein stórlægðin muni dýpka fyrir sunnan land á fimmtudag og föstudag - dóla síðan austur til Bretlandseyja og valda því að austan- og norðaustanáttin milda sem ríkt hefur að undanförnu heldur sínu striki. Að vísu koma kuldaskil úr vestri inn á landið á fimmtudag með einhverri snjókomu. Það ástand stendur þó varla nema í hálfan sólarhring eða svo.

 

Kortið sýnir spá evrópureiknimiðstöðvarinnar um sjávarmálsþrýsting, úrkomu og hita í 850 hPa-fletinum um hádegi á fimmtudag (30. janúar). Þá lifir vestansóknin enn í formi mjórra kuldaskila. Á undan þeim er suðaustanstrekkingur með slyddu eða rigningu en snýst síðan snögglega yfir í vestur með slyddu eða snjó. Þetta er skarpt lægðardrag - það sjáum við á legu þrýstilína í því.

Svo er lægðin mikla lengra suðvestur í hafi og dýpkar rosalega - eins og margar þær fyrri í vetur. Evrópureikimiðstöðin nefnir töluna 937 hPa í miðju um hádegi á föstudag, e.t.v. aðeins vel í lagt - en það kemur í ljós.

Á kortinu að neðan sjáum við þriggja tíma þrýstibreytingu, frá því kl. 9 til kl.12 á fimmtudaginn.

Á undan lægðarmiðjunni suðvestur í hafi fellur þrýstingur mjög - svo mikið að rauða litnum brestur afl og skiptir yfir í hvítt á litlu svæði. Þar hefur þrýstingurinn fallið um 17,5 hPa á þremur tímum. Við sjáum að loftvog fellur á undan lægðardraginu við Suðvesturland en rís handan þess - eins og vera ber. En hryggurinn litli sem viðheldur vestanáttinni gufar upp þegar hann fær á sig svona mikið þrýstifall. Þar með er vestanáttin búin. En segja má að hún dugi þó í það að halda austanátt lægðarinnar miklu í skefjum hér á landi. En það hvessir þó sums staðar á föstudag og laugardag.

Yfir í annað: Hlákan langa lifir en á Stórhöfða í Vestmannaeyjum og á Vattarnesi (og reyndar líka á vegagerðarstöðinni við Hvalnesskriður, þar er lægsti hiti mánaðarins 0,1 stig). Síðast fraus á Stórhöfða 27. desember, þannig að lengd frostleysunnar er því hér með orðin 32 dagar.

Ritstjórinn er forvitinn maður og fletti þess vegna upp á vetrarhlákum á Stórhöfða allt aftur til 1949. Við lesturinn kom í ljós að einu sinni hefur komið 33 daga hláka á Stórhöfða um miðjan vetur og ef morgundagurinn (miðvikudagur 29. janúar) heldur jafnast sú lengd þar með. Bætist fimmtudagurinn við er um nýtt met að ræða. Sú 33 daga hláka sem hér um ræðir stóð frá og með 12. desember 1997 til og með 13. janúar 1998.

Engin svona löng vetrarhláka endar í febrúar á þessu 65 ára tímabili, en hins vegar tvær í mars. Um þetta mætti fjalla meira þegar endanlega verður séð hversu lengi núverandi hláka stendur.

Og yfir í enn annað: Spurt var um stormspár - hvenær kom síðasti stormspárlausi dagurinn á Veðurstofunni (land OG mið)? Ritstjórinn er ekki alveg nógu kunnugur villum í textaspárgrunni Veðurstofunnar til að vera öruggur um svarið - en sýnist samt að það muni hafa verið 24. nóvember. Á þessu mætti líka smjatta meira síðar.

Og - enn annað: Frést hefur frá Alaska að hitabylgjan þar hafi slegið mikinn fjölda meta - þar á meðal ýmis háloftahitamet yfir Barrow-höfða nyrst í fylkinu og Fairbanks í því miðju. Hiti í 850 hPa fór í 7,0 stig (C), nærri þremur stigum hærra en fyrra met janúarmánaðar yfir Barrow. Reyndar hefur hiti þar aldrei mælst hærri en 5 stig í 850 hPa í janúar til mars. Yfir Fairbanks fór þykktin í 5545 metra og hefur aldrei orðið jafnhá eða hærri í neinum mánuði á tímabilinu nóvember til mars, en mælingar ná meira en 60 ár aftur í tímann. Upplýsingar eru fengnar af  ágætri bloggsíðu heimamanna.

Ritstjórinn er að vinna að endurgerð metaskrár háloftastöðvarinnar á Keflavíkurflugvelli - verður hún vonandi tilbúin fyrir næsta hrun í makrílstofninum.

Athugasemdir

[Hilmar Hafsteinsson (IP-tala skráð) 29.1.2014 kl. 21:05]

Alúðar þakkir, Trausti, fyrir fróðleikinn.

Yfir í enn annað: Glæný frétt cnsnews.com greinir frá því að loftslagsvísindamaðurinn og jöklafræðingurinn Dr. Don Easterbrook spái hnattkólnun a.m.k. næstu tvo áratugina:

“For the next 20 years, I predict global cooling of about 3/10ths of a degree Fahrenheit, as opposed to the one-degree warming predicted by the IPCC,” said Easterbrook, professor emeritus of geology at Western Washington University and author of 150 scientific journal articles and 10 books, including “Evidence Based Climate Science,” which was published in 2011. (See EasterbrookL coming-century-predictions.pdf)"

... og ennfremur er haft eftir Dr. Don Easterbrook:

"Easterbrook noted that 32,000 American scientists have signed a statement that there’s no correlation between climate change and carbon dioxide levels. “I am absolutely dumbfounded by the totally absurd and stupid things said every day by people who are purportedly scientists that make absolutely no sense whatsoever…."(!)

> http://cnsnews.com/news/article/barbara-hollingsworth/climate-scientist-who-got-it-right-predicts-20-more-years-global

[Höskuldur Búi Jónsson, 29.1.2014 kl. 22:38]

Hilmar:  Don Easterbrook spáði því að frá byrjun aldarinnar og fram til ársins 2030 þá myndi jörðin kólna um 1,1-2,8C. Nú er næstum búinn helmingurinn af því tímabili og hvað hefur kólnað mikið? Hvað segir hann núna - eftir 20 ár verður búið að kólna um einhver brot úr gráðu? Er eitthvað að marka spámann sem færir alltaf tímabilið til þegar spáin gengur ekki? Þetta minnir á tal ónefnds bloggara hér á Íslandi sem oft er vitnað í af íslenskum efasemdamönnum - hann er búinn að spá lítilli Ísöld frá árinu 1998 ;)

Á loftslag.is höfum við skrifað smá um önnur "vönduð" vinnubrögð Easterbrook, sjá Að fela núverandi hlýnun

[Hilmar Hafsteinsson (IP-tala skráð) 29.1.2014 kl. 23:30]

Fyrst þetta:

"1.5 Jarðfræðingur á að vera gagnrýninn, jafnt á eigin niðurstöður sem annarra, og á ekki að samþykkja niðurstöður annarra fræðimanna af orðspori þeirra einu saman né á hann að samsinna viðteknum skoðunum af gömlum vana. Hann á ávallt að vera reiðubúinn að skipta um skoðun á einstökum málum ef ástæða er til.

Það eru m.a óvönduð og óvísindaleg vinnubrögð ef jarðvísindamaður vísvitandi:

Býr umyrða- og fyrirvaralaust til upplýsingar sem engar heimildir eru fyrir.

Falsar heimildir og dagsetningar.

Notar með ólögmætum eða óviðteknum hætti ritverk, hugmyndir eða kenningar annarra.

Velur úr heimildum aðeins það sem hentar niðurstöðum hans en sleppir að geta þess sem mælir á móti .

Misnotar tölulegar upplýsingar til stuðnings niðurstöðum sínum

Gætir ekki fyllstu sanngirni gagnvart skoðunum annarra.

Getur ekki framlags samverkamanna sinna, aðstoðarmanna, nemenda og annarra sem hafa komið að verkinu." (http://www.jfi.is/sidareglur/)

Svo þetta:

"Á loftslag.is höfum við skrifað smá um önnur "vönduð" vinnubrögð Easterbrook, sjá Að fela núverandi hlýnun"(sic)

Og hvernig er svo "vandaða" umfjöllunin hans HBJ um meint "vönduð" vinnubrögð Easterbrook á loftslag.is?

"Fyrir nokkrum vikum var haldin ráðstefna efasemdamanna um hnattræna hlýnun og einn fyrirlesara virðist kunna flestar brellurnar í handbók efasemdamanna. Það er Don Easterbrook, fyrrum prófessor í jarðfræði og áður væntanlega þokkalega virtur í sínu fagi. Hann hefur verið sannfærður undanfarin ár að Jörðin eigi eftir að verða fyrir kólnun á næstu árum og áratugum. Þessi sannfæring hans á reyndar ekki við nein vísindaleg rök að styðjast." (http://www.loftslag.is/?p=7682)

Dæmi nú hver fyrir sig. . .

"6 VIÐURLÖG

6.1 Teljist félagi brotlegur við þessar reglur sætir mál hans meðferð samkvæmt ákvæðum í lögum eða samþykktum JFÍ."

[Höskuldur Búi Jónsson, 29.1.2014 kl. 23:52]

Hilmar: Þú ættir kannski að ræða aðeins við þennan Don Easterbrook - hann hefði gott af smá tiltali um siðfræði   ... en í alvöru talað, hafðu samband við jarðfræðifélagið ef þér finnst ég vera að brjóta eitthvað á þér og öðrum með því að benda á augljósar villur og rangfærslur.