Litlar veðurbreytingar næstu daga (að sögn)

Rétt er að byrja á að óska lesendum öllum nær og fjær gleðilegra jóla. Norðanáttin er stríð þessa dagana og satt best að segja er ekki spáð miklum breytingum. Eins og algengt er í þessari vindátt er vindur mestur til þess að gera neðarlega í veðrahvolfinu jafnvel neðan við einn kílómetra. Uppi í 5 km hæð er vindur hægur.

Loftþrýstingur er enn lágur. Algengast er að lægðabeygja sé á jafnþrýstilínum í lágum loftþrýstingi. Það þýðir að norðanáttin er af til þess að gera austrænum uppruna - hún er ekki mjög köld. Í dag (jóladag) er örmjó ræma af heimskautalofti við strönd Norðaustur-Grænlands - en annars er aðeins um svaltemprað loft að ræða fyrir norðanáttina að bíta.

Á milli heimskautaloftsins og þess hlýrra eru nokkur átök - að hluta til valda þau hvassviðrinu hér á landi - og við átökun verða til stutt lægðardrög sem berast í vindinum úr norðri og inn yfir landið. Evrópureiknimiðstöðin sýnir eitt þeirra skammt fyrir norðan land aðra nótt (aðfaranótt þriðja í jólum). Kortið nær yfir hæð, hita, vindátt og vindhraða í 925 hPa-fletinum.

 

Lægðardragið sést mjög skýrt fyrir norðan land þar sem fingur af hlýju lofti stingur sér inn í kaldara loft vestan við. Vindur er mjög hvass í vesturjaðri dragsins, 25 til 35 m/s í rúmlega 500 m hæð yfir sjávarmáli - en heldur minni neðar. Við sjáum líka hvernig vindur snýst í hánorður þegar lægðardragið nálgast (jafnvel norðvestur norðaustanlands) og á eftir því tekur norðaustanáttin aftur við með sínum beljanda - eins og ekkert hafi í skorist.

Síðara jólakortið sýnir hæð 500 hPa-flatarins og þykktina á mestöllu norðurhveli um hádegi þennan sama dag (þriðja í jólum).

 

Ísland er rétt neðan við miðja mynd. Jafnhæðarlínur eru heildregnar og því þéttari sem þær eru því meiri er vindur. Við sjáum að sáralítill vindur er yfir Íslandi og langt í aðalvindstrengi heimskautarastarinnar. Mikil lægð er hins vegar yfir Bretlandseyjum og veldur illviðri á stóru svæði. Greinilega eru líka leiðindi í gangi við Ítalíu.

Litir sýna þykktina en hún mælir hita í neðri hluta veðrahvolfs. Mörkin á milli grænna og blárra lita eru við 5280 metra, Ísland er aðeins inni í bláa litnum - hiti er ekki fjarri meðallagi árstímans. Illviðrið hér á landi nær ekki upp í þetta kort.

Við sjáum að þeir stóru kuldapollar norðurhvels sem við höfum hér til gamans kallað Stóra-Bola og Síberíublesa (fjólubláu svæðin) eru nokkurn veginn í sínum hefðbundnu bólum - og bíða færis. Ekki gott að segja hvað gerist næst. Ekki er ólíklegt að áramótaveðrið sé í undirbúningi við vötnin miklu í Ameríku.

Athugasemdir

[Hilmar Hafsteinsson (IP-tala skráð) 26.12.2013 kl. 15:27]

117 ára úrkomumet (frá 1896) var slegið í Milwaukee, USA, 22. des.sl.!

> http://news.wpr.org/post/winter-storm-brings-record-snowfall-wisconsin

Hundruðir þúsunda heimila í Bandaríkjunum, Kanada og Bretlandi án rafmagns og hita yfir jólin!

> http://usnews.nbcnews.com/_news/2013/12/24/22032672-winter-weather-as-temperatures-plummet-hundreds-of-thousands-face-a-christmas-without-power?lite%3

Farþegaskipið MV Akademic Shokalskiy er fast í ís við Suðurskautið og björgunarleiðangur á leiðinni (ath. það er "sumar" á Suður-heimskautinu!)

> http://www.smh.com.au/technology/sci-tech/antarctic-tourist-ship-trapped-by-sea-ice-20131225-2zwjr.html

[Pálmi Freyr Óskarsson, 26.12.2013 kl. 17:56]

 Hér er hin hliðinn Hilmar.

http://uk.news.yahoo.com/video/moscow-warmest-weather-century-172730784.html

 http://www.tnp.no/norway/panorama/4205-warmest-christmas-of-42-years-in-norway

[Hilmar Hafsteinsson (IP-tala skráð) 27.12.2013 kl. 21:07]

Litlar veðurbreytingar næstu daga - og litlar hnatthitasveiflur síðustu 12 ár!

RSS global temperature anomalies:

> http://notalotofpeopleknowthat.files.wordpress.com/2013/12/image58.png

UAH global temperature anomalies:

> http://notalotofpeopleknowthat.files.wordpress.com/2013/12/image59.png

HADCRUT4 global temperature anomalies:

> http://notalotofpeopleknowthat.files.wordpress.com/2013/12/image60.png

GISS global temperature anomalies:

> http://notalotofpeopleknowthat.files.wordpress.com/2013/12/image61.png

Hvar er "óðahlýnunin"? Svarið er einfalt. Engin hnatthlýnun hefur átt sér stað síðustu 12 ár, skv. meðfylgjandi gögnum og reyndar má færa rök fyrir því að meint hnatthlýnun hafi stöðvast fyrir 15 árum síðan!

Kenningin/tilgátan um meinta "hnatthlýnun af manna völdum" er því bersýnilega að engu hafandi :)