Meir af (jóla-)vindstrengjunum tveimur

Í gær var hér fjallað um tvo vindstrengi sem munu ef spár rætast plaga okkur um jólin. Annar kemur úr norðri - breiðist frá Grænlandssundi og inn á land að kvöldi þorláksmessu. Hinn kemur úr suðaustri síðdegis á aðfangadag og fylgir einni dýpstu lægð sem sést hefur á Norður-Atlantshafi - hún gæti orðið sú dýpsta það sem af er 21. öldinni.

Við lítum á kort sem gildir kl. 21 að kvöldi þorláksmessu og sýnir hæð 925 hPa-flatarins ásamt vindstyrk, vindátt og hita í fletinum.

 

Ofurlægðin er í suðurjaðri kortsins. Þar sést það sem sést nærri því aldrei - að 925 hPa flöturinn er við það að snerta jörð. Yfirleitt er hann í mörg hundruð metra hæð - ef maður hefur ekki græna glóru er giskað á 600 metra.

Grænlandssundsstrengurinn nær hér inn á Vestfirði (eða þar um bil) með sínum 30 til 35 m/s í fjallahæð. Meira er að bætast í kalda loftið úr norðri þannig að strengurinn breiðir úr sér. Þetta loft er þó ekki sérlega kalt miðað við uppruna - en er kólnandi. Í pistli gærdagsins var fjallað um kuldapollinn litla sem er á leið til suðvesturs meðfram Grænlandi.

En hlýja loftið við lægðina er líka í framsókn, mest munar þó um það að lægðin er á hreyfingu til norðausturs og grynnist lítið. Það verður - sé að marka spár - um eða fyrir hádegi á aðfangadag að norðaustanstrengur hennar nær að teygja sig til Íslands.

Reiknimiðstöðvar eru ekki alveg sammála um framhaldið - en hér að neðan má sjá tillögu evrópureiknimiðstöðvarinnar um vind í 100 metra hæð á aðfangadagskvöld kl. 18. Rétt er að hafa í huga að upplausn líkansins nær ekki taki á landslagi og er mælt með því að smáatriði spárinnar yfir landi séu tekin með varúð.

 

Hér má sjá strengina tvo - mjög snyrtilega. Annan með bólstað við Vestfirði - en hinn við Suðausturland. Staðan er síst betri sólarhring síðar (jóladag).

Athugasemdir

[Hilmar Hafsteinsson (IP-tala skráð) 22.12.2013 kl. 15:29]

"Einar Sveinbjörnsson veðurfræðingur spáir mjög slæmu norðankasti um landið norðan- og austanvert um jólin. Þetta verði samfellt hríðarveður í 3-4 sólarhringa. Á jóladag megi búast við versta norðankasti í a.m.k. hálfa öld og þ.a.l. megi búast við miklum samgöngutruflunum á Norður- og Austurlandi."(sic)

> http://www.mbl.is/frettir/innlent/2013/12/22/versta_nordankast_i_halfa_old/

Er e.t.v. kominn tími fyrir suma að viðurkenna að það er farið að kólna örlítið? :)

[Pálmi Freyr Óskarsson, 22.12.2013 kl. 16:25]

Datt mér ekki hug að þú mundir gripa gæsina með MBL.is-fréttina Hilmar.

Þetta er bara "smá" hiksti í hlýnunni (lesist ekki hjá mér sem óðahlýnun).

[Sigurður Þór Guðjónsson, 22.12.2013 kl. 20:22]

Það kemur þarna fram að loftið sé ekki sérlega kalt miðað við uppruna. Kannski er það einmitt vegna þess að það er að hlýna ofurlítið! 

[Bjarki (IP-tala skráð) 22.12.2013 kl. 23:14]

Myndi nú frekar hafa áhyggjur á öfgum í veðrum, frekar en að einblína á hlýnun jarðar.

[Sigurður Þór Guðjónsson, 22.12.2013 kl. 23:22]

Einhvern tíma henda mestu afbrigðin fyrir hvaða daga sem er. Enginn ástæða til að lesa neitt sérstakt út úr þessu.

[Hilmar Hafsteinsson (IP-tala skráð) 23.12.2013 kl. 00:04]

"Trausti Jónsson veðurfræðingur segir að vindstrengurinn sem kemur til landsins síðdegis á aðfangadag fylgi einni dýpstu lægð sem sést hafi á Norður-Atlantshafi. Hún geti orðið sú dýpsta það sem af er 21. öldinni."(sic)

> http://www.mbl.is/frettir/innlent/2013/12/22/gaeti_ordid_dypsta_laegd_21_aldar/

Ef menn hirða um að lesa blogg Trausta þá kemur þar glögglega fram að: "Hinn kemur úr suðaustri síðdegis á aðfangadag og fylgir einni dýpstu lægð sem sést hefur á Norður-Atlantshafi".

Sigurður Þór Guðmundsson ætti að gera sér grein fyrir því að loft sem berst inn yfir landið með lægð úr suðaustri er eðlilega ekki sérlega kalt :) Hitt er svo annað mál að Íslandskortið er þokkalega blátt fram á nýárið.

[Emil Hannes Valgeirsson, 23.12.2013 kl. 00:15]

Við verðum í kuldanum út árið. Í staðinn fá íbúar meginlands Evrópu hlýindin.

[Sunna Sturludóttir (IP-tala skráð) 23.12.2013 kl. 00:39]

Ég spyr á ég þá ekki að ferðast frá Selfossi eftir kl 16:00 til Voga vatnsleysuströnd á aðfangadag ein í bíl ?

[Trausti Jónsson, 23.12.2013 kl. 01:23]

Sunna, hér eru engar spár - aðeins fjallað um þær. Til að gera alvöruspár þarf að fylgjast með veðri allan sólarhringinn - það getur ritstjóri hungudiska ekki. Veðurstofan tekur þér ábyggilega vel ef þú slærð á þráðinn og berð upp þessa spurningu.