Myndarleg lægð

Lægðin sem stefnir hingað að kvöldi 17. júní er nokkuð djúp. Þrýstingi í lægðarmiðju er spáð niður fyrir 980 hPa á þriðjudaginn. Svo djúpar lægðir koma ekki að landinu á hverju ári í júnímánuði.

Spár eru ekki sammála um hversu lágt þrýstingurinn fer hér á landi - en hann gæti þó orðið lægri heldur en síðan 2002 - í júnímánuði að segja. Þá gerði eftirminnilegt illviðri einmitt þann 18. júní og segja sumir að þar með hafi sumrinu lokið það árið - því það stórsá á gróðri.

Fyrri hluti júnímánaðar 2002 var fádæma góður og náði hiti í Reykjavík þá 22,4 stigum - einstakt svo snemma sumars.

Lægðin núna verður vonandi ekki nærri því svo slæm en við sjáum þó á kortinu hér að neðan að þrýstilínur eru þéttar sunnan og suðaustanvið lægðarmiðjuna. Vindur þar gæti farið í 15 til 20 m/s þar sem mest er.

Kortið er fengið úr hirlam-reiknilíkaninu og gildir kl. 9 á þriðjudagsmorgni 18. júní. Þrýstilínur eru dregnar með 2 hPa bili og þrýstibratti sýnist því meiri heldur en er á kortum þar sem 4 eða 5 hPa eru notuð milli lína - en það er algengast.

Athugasemdir

[Sandy, 17.6.2013 kl. 05:15]

Takk fyrir að segja frá þessu þá get ég bjargað sumarblómunum mínum sem ég er ný búin að planta í skjól.

[Sigurður Þór Guðjónsson, 17.6.2013 kl. 12:30]

Hvar er eignlega sumarið?! Hvar endar þetta?!

[Hilmar Hafsteinsson (IP-tala skráð) 17.6.2013 kl. 13:46]

Hvar er eiginlega óðahlýnunin?! Hvar endar þetta?!

[Björn J. (IP-tala skráð) 17.6.2013 kl. 23:03]

Þetta sumar ætlar svo sannarlega að vera sumar án sumarveðurs.

Nú er langt liðið á júní og enn bólar ekkert á betra veðri. Það styttist í haustið, og önnur haustlægðin í ár geisar nú 17. júní.

Ég er farinn að hlakka til haustsins, því sumarið er að verða ónýtt. Veðrið haust verður áreiðanlega betra en þetta leiðindasumarveður.

Loftlagshlýnunarsinnar hljóta að vera ánægðir með þessa þróun. Annars væru þeir bara vanþakklátir.

Amk. er eitt víst að svona verður veðráttan nái markmið og óskir loftslagshlýnunarsinnar að rætast, svöl, vætusöm og sólarlítil sumur, og síðan kaldir og snjóþungir vetur.

Þá ættu lofslagshlýninarsinnar að verða ánægðir.

Verði þeim þá að góðu!

[Trausti Jónsson, 18.6.2013 kl. 00:56]

Og ekki allt búið enn.