Af suðlægri stöðu heimskautarastarinnar

Þeir sem fylgjast með erlendum veðurfréttum er fullkunnugt um óvenjulega stöðu heimskautarastarinnar um þessar mundir. Er henni kennt um kuldatíð í Evrópu og Ameríku. Ætli þar sé ekki rétt með farið.

En lítum á spá kort af N-Atlantshafi sem gildir um hádegi á páskadag. Þar má sjá hæð 300 hPa-flatarins og vindstyrk og stefnu í honum.

w-blogg300313a

Jafnhæðarlínur eru heildregnar. Vindstyrkur og stefna eru sýnd með hefðbundnum vindörvum, en vindstyrkur auk þess með lit. Við sjáum rétt í norðurjaðar rastarinnar yfir Spáni. Norðan við Ísland er önnur röst. Hún liggur í suðurjaðri aðalkuldapollanna yfir N-Íshafi. Bylgjur á henni hafa blessunarlega látið okkur vera að mestu.

En lítum nú á stærra sjónarhorn á sömu spá - megnið af norðurhveli norðan við 30. breiddargráðu.

w-blogg300313b

Hér sjáum við betur. Meginkjarni rastarinnar (skotvindurinn) liggur suður á 35. breiddargráðu og á að haldast þar næstu daga að minnsta kosti.

En nú fer smám saman að vora á norðurhveli og þá dregur úr rastavirkni. Auðvitað vilja menn kenna þessa óvenjulegu stöðu ísbráðnun síðastliðins sumars í Íshafinu. Birtist nú hver greinin á fætur annarri þar sem þessi skipan mála er rökstudd. Stefan Rahmstorf, einn þekktasti hringrásarspekingur samtímans fjallar um þetta í bloggpistli. Tengillinn er á þýðingu þýska textans á ensku. Þar má finna tengil á þýska, upprunalega textann. Í greininni er líka athyglisvert skítkast.


« Síðasta færsla | Næsta færsla »

Athugasemdir

1 Smámynd: Gunnar Th. Gunnarsson

Vissulega athyglisvert skítkast.... en samt afskaplega dæmigert og fyrirsjáanlegt. Auðvelt að skynja tóninn í greininni, strax frá byrjun og þegar talsmaður þýsku veðurstofunnar dirfist að efast um þessa kenningu, þá er efast um að hann hafi lesið "fræðin" og undrast því að hann yfir höfuð tjái sig um málið.

Vandræðalegt fyrir þýsku veðurstofuna, segir greinarhöfundur og klikkir svo út með að segja:  "Unfortunately, it has a certain tradition that meteorologists dealing with weather, are not familiar with climate science. "

Það er s.s. óþægilega margir veðurfræðingar sem efast

Gunnar Th. Gunnarsson, 30.3.2013 kl. 03:34

2 Smámynd: Emil Hannes Valgeirsson

Á maður að vera að efast um kenningar eins þekktasta hringrásarspekins samtímans (sem ég reyndar þekki ekki sjálfur)? Reyndar finnst mér það hljóma frekar langsótt að minni hafís í lok sumars hafi þessi miklu áhrif langt fram á vetur. Munurinn á útbreiðslu hafíss að vetrarlagi nú og fyrir nokkrum árum er hinsvegar ekki svo mikill. En hvað veit maður?

Svo er alltaf spurning hvað er orsök og hvað er afleiðing. Hlýnar sjórinn af því að ísinn minnkar eða minnkar ísinn af því sjórinn hlýnar?

Emil Hannes Valgeirsson, 30.3.2013 kl. 20:05

3 Smámynd: Gunnar Th. Gunnarsson

Nú! Má maður ekki efast ef viðkomandi er þekktur í faginu?

Gunnar Th. Gunnarsson, 30.3.2013 kl. 20:34

4 Smámynd: Emil Hannes Valgeirsson

Ég veit það ekki Gunnar, enda varpaði ég þeirri spurningu fram.

Emil Hannes Valgeirsson, 30.3.2013 kl. 20:58

5 Smámynd: Guðrún María Óskarsdóttir.

Sæll Trausti, ég er dyggur lesandi þinna pistla.

Ég hygg að innan veðurfræði sem annarra vísínda sé það hollt að efast að ákveðnu marki en allt er það spurning um hvar menn draga mörkin hver og einn.

Mín skoðun er sú að veðurfar hafi breyst hér á landi sem byggist á eigin vitund fyrir því hinu sama án þess að ég fari nánar út í það.

kv.Guðrún María.

Guðrún María Óskarsdóttir., 31.3.2013 kl. 00:32

6 Smámynd: Trausti Jónsson

Pirringur Stefan Rahmstorf út í stétt spáveðurfræðinga er ekki alveg ástæðulaus (því miður). Betur færi þó á því að hann sleppti því að láta slíkt í ljós. Hann tekur síðan greinilega fram undir lok pistilsins að málið (ísrýrnun -> meiri austanátt á meginlöndunum) sé alls ekki afgreitt: "Still this is still not settled science - the studies are relatively new and need to be discussed intensively in the professional community and confirmed by further research, or perhaps called into question". Í þessari setningu er reyndar dulinn viðbótarpirringur - sjá menn hver hann er? En Rahmstorf er einn af þekkstustu vísindamönnum á sviði loftslagsrannsókna - prófið að gúggla hann - eða fletta upp á Wikipediu.

Trausti Jónsson, 31.3.2013 kl. 01:44

7 Smámynd: Gunnar Th. Gunnarsson

"professional community"....  "óbreyttir" veðurfræðingar væntanlega ekki í þeim hópi?

Gunnar Th. Gunnarsson, 31.3.2013 kl. 15:43

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Nýjustu myndir

  • w-blogg120324a
  • w-blogg080324a
  • w-blogg010324c
  • w-blogg010324b
  • w-blogg010324a

Heimsóknir

Flettingar

  • Í dag (19.3.): 7
  • Sl. sólarhring: 77
  • Sl. viku: 975
  • Frá upphafi: 2341349

Annað

  • Innlit í dag: 6
  • Innlit sl. viku: 893
  • Gestir í dag: 6
  • IP-tölur í dag: 6

Uppfært á 3 mín. fresti.
Skýringar

Eldri færslur

Innskráning

Ath. Vinsamlegast kveikið á Javascript til að hefja innskráningu.

Hafðu samband