Nærri því - en ekki alveg

Lægðin mikla suður í hafi heldur sínu rosastriki. Spár segja enn (seint á föstudagskvöldi 25. janúar) að miðjuþrýstingur hennar fari niður fyrir 930 hPa. Sjálf lægðarmiðjan kemst aldrei nærri Íslandi en kerfið hreinsar til í kringum sig og gefur kalda loftinu við Norðaustur-Grænland tækifæri til að sýna sig eftir að vinsamlegar fyrirstöðuhæðir hafa haldið því í skefjum um skeið. Við lítum á spá evrópureiknimiðstöðvarinnar sem gildir á hádegi á laugardag.

w-blogg260113a

Kortið sýnir sjávarmálsþrýsting, úrkomu og loks hita í 850 hPa. Erfitt er að sjá hvort það er talan 926 eða 928 sem færð er inn við lægðarmiðjuna - en kortið batnar mjög við stækkun. Þarna er lægðin varla byrjuð að hafa bein áhrif hér á landi, hins vegar eru tveir nokkuð snarpir vindstrengir við landið.

Annar þeirra (merktur með rauðri tölu, 1) er á milli Vestfjarða og Grænlands. Hann hefur enga beina tengingu við lægðina - en þarna er suðurjaðar kalda loftsins á ferð. Þarna eru 15 til 20 m/s og jafnvel meira á stóru svæði. Vestan við Ísland er vindur mun hægari en annar vindstrengur heldur mjóslegnari (merktur sem 2) er við Suðurland. Þar fór smálægð til vesturs á föstudagskvöld og aðfaranótt laugardags og olli snjókomu.

Þar fyrir sunnan er vindur aftur mun hægari þar til komið er í mikla austanátt á undan skilum lægðarinnar miklu (merkt sem 3). Þessi vindstrengur er búinn að slíta sig frá kreppuhringnum óða umhverfis lægðarmiðjuna. Það þýðir að lægðin hefur náð fullum styrk - gæti orðið eitthvað lítillega dýpri en hún fer síðan að grynnast.

Það sem gerist næst er að vindstrengur þrjú fer til norðurs í átt til landsins - við sleppum ekki alveg við lægðina. Væri kalda loftið ekki að þvælast fyrir myndi strengurinn fara norður fyrir land og afskaplega blíð austlæg átt fylgdi í kjölfarið hér um slóðir. En kalda loftið gefur sig lítið - þannig að vindstrengirnir þrír sameinast í einn breiðan (sem Ísland teygir eitthvað til).

Næsta kort gildir á hádegi á sunnudag - sólarhring síðar en kortið að ofan.

w-blogg260113b

Hér hefur lægðin grynnst upp í 938 hPa. Kreppuhringurinn er enn býsna öflugur en töluvert bil er á milli hans og Íslands. Nú er spurning hvernig vindstrengurinn sem sjá má yfir Íslandi (þrýstilínurnar eru þéttar) kemur til með að leggja sig. Ekki skal um það fjallað hér.

Sömuleiðis er ekki ljóst hver hitinn verður - þykktin spáir frostleysu um mestallt land. En kalda loftið norðurundan er býsna öflugt og gæti blandast suður yfir mestallt landið í neðri lögum. Ef úrkoma er að ráði kælir hún líka niður að frostmarki. En það á auðvitað að fylgjast með spám Veðurstofunnar í þeim efnum.

Á kortinu má sjá illilega lægð austur af Nýfundnalandi. Hún verður ekki nærri því eins djúp og sú fyrri en miðar mjög ógnandi á Bretlandseyjar. Aðrar tvær eiga að fylgja á eftir síðar í vikunni.

Við lítum að lokum á 500 hPa hæðar- og þykktargreiningu reiknimiðstöðvarinnar á hádegi í dag (föstudag).

w-blogg260113c

Heildregnu línurnar sýna hæð 500 hPa-flatarins en litirnir þykktina. Kortið batnar mjög við stækkun. Við höfum að undanförnu fylgst með kuldapollinum Stóra-Bola í líki mikillar fjólublárrar klessu yfir Kanada. Nú er sá litur horfinn. Kaldasta loftið hefur sturtast út yfir Atlantshaf undanfarna viku og orðið að með afbrigðum góðu fóðri fyrir þrjár hraðvaxandi ofurlægðir. Kalda loftið sem eftir er er enn að streyma til austurs og fóðrar Bretlandsógnirnar þrjár. Rauða örin bendir á riðabylgju stóru lægðarinnar í dag.

Á kortinu er hringrásarmiðja kuldapollsins komin út yfir Atlantshaf austur af Labrador. Hún mun grynnast og þokast til austurs og verndar þar með okkur fyrir árásum úr suðvestri - nýjar lægðir ganga ekki þvert í gegnum kuldapolla heldur til hliðar við þá. Bretlandsógnirnar draga ellimóðan Stóra-Bola með sér - smáspöl hver þeirra uns hann hverfur í eina bylgjuna.

Nýr kuldapollur sem líka heitir Stóri Boli er á kortinu að plaga norðurströnd Alaska og slóðir Vilhjálms Stefánssonar á Banks-eyju. Hann mun síðar breiða úr sér og taka sæti þess fyrra - þó gerir evrópureiknimiðstöðin ekki ráð fyrir því að hann verði jafnöflugur það sem séð verður (7 til 10 dagar). En við bíðum í spennu - eins og venjulega.

Takið eftir því að kuldapollurinn yfir Síberíu (Síberíu-Blesi) hefur einnig misst fjólubláa litinn að mestu. Er veturinn eitthvað að tapa sér?


« Síðasta færsla | Næsta færsla »

Athugasemdir

1 identicon

... og svo þykjast veðurfræðingar vera þess umkomnir að upplýsa almenning um hvernig veðrið verður eftir tæpa öld! :)

Hilmar Hafsteinsson (IP-tala skráð) 26.1.2013 kl. 08:57

2 identicon

http://www.wetterzentrale.de/pics/Rtavn1441.html
Er eitthvað til í svona spám?

Þorkell Guðbrandsson (IP-tala skráð) 26.1.2013 kl. 18:32

3 Smámynd: Sveinn Atli Gunnarsson

Veðurfræðingar telja sig ekki geta upplýst um veður eftir tæpa öld...hvað þá ár...þetta er einhver misskilningur í Hilmari. En það er þó algengt að fólk blandi saman veðri og loftslagi - sem ekki er það sama. Reyndar er engin sem telur sig vita nákvæmlega hvernig loftslagið verður (sem Hilmar er væntanlega að vísa til) en þó eru vísbendingar um að hitastigið muni hækka verulega vegna aukina gróðurhúsaáhrifa...þó erfitt sé að segja um hver útkoman verður eftir tæpa öld.

Sveinn Atli Gunnarsson, 26.1.2013 kl. 21:52

4 Smámynd: Trausti Jónsson

Þorkell. Já, stundum er eitthvað til í 5 til 7 daga spám - en alls ekki alltaf. Kanadíska veðurstofan var með svipaða mynd og þú tengir á - og evrópureiknimiðstöðin er með sömu lægðina en talsvert grynnri. Í næstu spásyrpu amerísku veðurstofunna á eftir þeirri sem þú tengir á er lægðin orðin líkari lægð reiknimiðstöðvarinnar. Miðstöðin er þó enn að hringla - munar 30 til 35 hPa frá einni syrpu til annarar þannig að óvissan verður enn að teljast mjög mikil.

Trausti Jónsson, 27.1.2013 kl. 01:21

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Hungurdiskar

Höfundur

Trausti Jónsson
Trausti Jónsson
Höfundur er veðurfræðingur og áhugamaður um veður.

Færsluflokkar

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Nýjustu myndir

  • w-blogg200324b
  • w-blogg200324a
  • Slide10
  • Slide9
  • Slide8

Heimsóknir

Flettingar

  • Í dag (28.3.): 58
  • Sl. sólarhring: 58
  • Sl. viku: 549
  • Frá upphafi: 2343311

Annað

  • Innlit í dag: 53
  • Innlit sl. viku: 499
  • Gestir í dag: 45
  • IP-tölur í dag: 40

Uppfært á 3 mín. fresti.
Skýringar

Eldri færslur

Innskráning

Ath. Vinsamlegast kveikið á Javascript til að hefja innskráningu.

Hafðu samband