Skýjasveipur yfir Austurlandi

Nú í kvöld (fimmtudag 3. ágúst) var skýjasveipur yfir landinu austanverðu - áberandi á gervihnattamyndum.

Mynd af vef Veðurstofunnar frá kl. 21:56. - En á sjávarmálskortum er lítið sem ekkert að sjá. 

Jafnþrýstilínur eru heildregnar á 4 hPa bili - varla línu að finna við landið - 1008 hPa hringar sig þó á Suðurlandi vestanverðu. Rigningarbakki er yfir Vestur-Skaftafellssýslu og teygir sig til norðurs og suðurs. Sjálfvirkar úrkomumælingar staðfesta legu bakkans. 

En þegar litið er upp mitt veðrahvolf sést hvers kyns er.

Þar má sjá allgerðarlegan kuldapoll - miðja hans og miðja sveipsins á myndinni falla einkar vel saman. Frostið í miðjum pollinum er meira en -24 stig - en hlýrra er til allra átta. 

Pollurinn er hvað öflugastur við veðrahvörfin. Það sést vel á 300 hPa-kortinu, í rúmlega 9 km hæð.

Hér er kerfið orðið hið gerðarlegasta. Hér er 300 hPa-flöturinn ofan veðrahvarfanna og þau hafa dregist niður yfir kuldapollinum - sá niðurdráttur veldur hærri hita í miðju kerfisins en fyrir utan það - einmitt yfir kuldanum sem undir er. Þessi samhverfa pörun kulda og hlýinda veldur því að ekkert þrýstikerfi sést við sjávarmál. - Sama á við mun minni poll við austurströnd Grænlands.

Mikill kuldapollur yfir Norðuríshafi er þessa dagana að verpa hverju kuldaegginu á fætur öðru og skýtur í átt til okkar. Það vil bara svo til að þessar sendingar eru ekki mjög stórar - en alveg nógu stórar ef út í það er farið - og þyngjast sjálfsagt er frá líður. 

Hlýir og kaldir dagar

Leikur dagsins fellst í því að telja hlýja og kalda daga í Reykjavík frá 1920 til 2016 og sjá hvernig þeir skiptast á ár og tímabil.

Hlýr dagur telst sá sem er meðal þeirra fimm hlýjustu í safni almanaksbræðra sinna á tímabilinu öllu. Árin eru 97 og hver almanaksdagur á því 97 bræður. Þeir fimm hlýjustu eru þá kallaðir hlýir, en þeir fimm köldustu kaldir. Ef tilviljun réði væru um 19 kaldir og hlýir dagar að jafnaði á hverju ári. Auðvitað er þetta nokkuð subbulegt - en látum gott heita.

Lítum fyrst á dreifingu hlýju bræðranna. Sjá má mikla klösun - er svo má kalla - á línuritinu má frekar sjá fjallgarða heldur en staka tinda.

Flestir söfnuðust hlýju dagarnir saman árið 2010, 59 - allstór kór, en fáliðaðir voru þeir 1986 - tveir sungu veikum rómi. Rauða línan sýnir 10-árakeðju - við sjáum að hún fylgir í aðalatriðum meðalhita í gegnum árin - betur heldur en einstök ár gera. 

Köldu dagarnir sýna auðvitað aðra mynd. Þeir voru flestir í kringum 1980, 1979 og 1983 þar efst á stalli með 58 kalda daga hvort ár - en hlýskeiðin auðvitað rýrari. Svo brá við árið 2016 að enginn kaldur dagur kom til Reykjavíkur - eina árið á öllu tímabilinu sem þeim árangri náði. 

Það er varasamt að fara að leggja allt of mikið út af þessu (margs konar gildrur á ferð) og verður ekki gert hér.